Armando Broja e ka mbyllur sezonin para kohe, teksa një dëmtim në ndeshjen miqësore të Çelsit me Aston Vilën në Emiratet Arabe e detyroi t’i nënshtrohej një ndërhyrje të vështirë kirurgjikale, e cila ka shkuar me sukses.
Teksa ylli kuzeqi ka nisur fazën e rikuperimit, mediat duket se nuk kanë ndërmend ta lënë të qetë, pasi emri i tij vijon të qarkullojë në merkato.
Versioni “online” i “La Gazzetta dello Sport”, duke folur për merkaton e Milanit, është fokusuar tek Broja.
Sulmuesi 21-vjeçar për kuqezinjtë e Piolit duket se përfaqëson një nga mundësitë reale për sulmin në sezonin 2023-2024, me Milanin që synon të blejë me patjetër një sulmues pykë.
Kjo pasi, Olivier Zhiru do të mbushë 37 vjeç, ndërsa duket e pamundur që Zlatan Ibrahimoviç të vijojë të luajë në nivele të larta.
Edhe Divok Origi nuk po jep sinjale pozitive pasi ka koleksionuar vetëm 14 prezenca e shumica si zëvendësues sepse ka qenë vazhdimisht në infermieri për shkak të problemeve të natyrës muskulore.
Operacioni Broja-Milan do të duhet të rivlerësohet kur lojtari të jetë rikuperuar plotësisht teksa për kuqezinjtë do të përfaqësonte një bast me mundësi të lartë suksesi pasi bëhet fjalë për një të ri me shumë perspektivë.
Dëmtimi, në mënyrë të pashmangshme, e ka ulur vlerën e kartonit të Brojës. Nëse deri pak javë më parë Çelsi nuk e lëshonte pa 40 milionë euro, shuma në këto momente është më e ulët se gjysma.
Formula e transferimit do të ishte ajo e huazimit me të drejtë blerjeje, teksa shqiptari do të duhej të kënaqej me të paktën 1.2-1.5 milionë euro, shumë që do të rritej në varësi të cilësisë së paraqitjeve.
Kjo pagë, sidoqoftë, do të ishte shumë më e ulët se 5 milionë euro (bruto) që futbollisti merr në Angli e çka e bën lojtarin shqiptar më të paguar në qarkullim.
