Klodiana Lala thotë se Mirel Mërtiri është “kutia e pandorës” në çështjen e inceneratorëve dhe se po bëhen përpjekje për ta shpëtuar atë.
E ftuar në emisionin “Të Paekspozuarit” në MCN TV, Lala deklaroi se afera e inceneratorëve nuk është hetuar si duhet, veçanërisht roli i Veliajt, Agaçit dhe zyrtarëve të tjerë të lartë.
Pjesë nga biseda në studio:
Klodiana Lala: Nuk ka asnjë të hetuar për inceneratorin e Tiranës. Nuk ka asnjë hetim për rolin e Veliajt. Inceneratori i Tiranës, nuk ekziston, ndërkohë qeveria hedh paratë e taksapaguesve shqiptarë atje. Nuk ka asnjë hetim të rolit të Ëngjëll Agacit, sekretar i Përgjithshëm i kryeministrisë, i cili është marrë në pyetje dhe unë personalisht e kam filmuar me celular se nuk kisha as kamera. Nuk dimë rolin e Ëngjëll Agaçit.
Nuk ka asnjë hetim dhe ende përgjigje nga SPAK, në lidhje me disa të dhëna ndaj zotit Ahmetaj. Kanë dalë dokumenta të hoteleve. Nuk kemi ende përgjigje për rolin e zotit Gjiknuri. Ka një kontratë të zotit Gjiknuri për energjinë për inceneratorin e Elbasanit. Po ta shohësh me kujdes, një nga vartësit e tij direkt, rezulton se kishte kontakte me bosët e inceneratorëve, me Mirel Mërtirin dhe Klodian Zoton.
Sot ne po merremi me Lefter Kokën. Në momentin që këta zyrtarë të jenë përballë drejtësisë dhe të ketë hetim të rolit të kryeministrit, atëherë do të jetë e hetur historia e inceneratorëve.
Artan Hoxha: Media që kanë përfituar qindra mijëra euro nga inceneratorët, tani nxjerrin disa fatura hoteli. Ne flasim 400 milionë. Historia e inceneratorëve ka përfunduar në luftë midis grupeve më të forta të pushtetit. Nuk është më luftë mazhorancë-opozitë. Është luftë mes grupeve më të forta brenda pushtetit. Dua që kjo luftë të vazhdojë. Por, shpresë që do të ndodhë ndonjë gjë e madhe nuk kam, sepse e di fare mirë se deri ku është dhënë leja për të shkuar.
Klodiana Lala: SPAK kishte tre vjet Mirel Mërtirin, por nuk guxonte ti vinte masë sigurie. Mirel Mërtiri rezulton sot truri i inceneratorëve. E gjithë lufta që po bëhet sot, është për të shpëtuar Mirel Mërtirin, i cili është kutia e pandorës. Ose mund ta mbyllë këtë histori ose mund ta rihapë dhe është fiks ajo historia e pusetave. Mund t’i vërë flakën, por po i vuri flakën, eksplozivi shkon atje lart, shumë lart….
Enton Abilekaj: Inceneratorët kanë qenë deri sot një hetim i kontrolluar, një çështje e kontrolluar nga SPAK-u. Ka dalë situata nga kontrolli me Alqi Bllakon, sepse nuk ishte parashikuar nga qeveria që Alqi Bllako të arrestohej. Aty nis edhe acarimi i Ramës, që thoshte pse nuk arrestoni edhe nga krahu tjetër. Pra ka qenë një hetim i kontrolluar. Dalja e palës tjetër, e ka dëmtuar nga hetimi i kontrolluar, është për për kërkuar një rihetim dhe për të shpërndarë përgjegjësinë.
