Më pak bakllava dhe gjela deti do të ketë në tryezat e familjeve elbasanase këtë fundvit. Një fakt të tillë e pohojnë vetë qytetarët, teksa shtojnë se rritja e çmimeve e ka vështirësuar ndjeshëm të përditshmen e tyre.
Ndonëse jemi në javën e fundit të vitit dhe tregjet në një kohë të zakonshme do të ishin të populluara, pamja që ofron tregu kryesor i fruta-perimeve në Elbasan është i boshatisur.
Numri i blerësve ka rënë ndjeshëm, ndërsa më së shumti blejnë produktet bazike të shportës. Uljen e ndjeshme të fuqisë blerëse e konfirmojnë vetë tregtarët, të cilët ankohen se shqiptarët kanë ikur në emigrim.
Sakaq qytetarët thonë se tryeza festive këtë vit do të jetë më e vakët, kryesisht të moshuarit. Përtej dëshirës së madhe për të festuar thonë se do të përshtaten sipas mundësive që kanë.
Po kaq e vështirë situata është edhe për familjet me fëmijë, të cilët u duhet të mendojnë edhe për dhuratat. Njëzëri thonë se ky vit ka qenë më i vështiri për të gjithë.
Kryesisht gjeli i detit dhe ëmbëlsirat janë rritur ndjeshëm këtë vit, duke bërë që mjaft familje të mendojnë për alternativa të tjera më pak të kushtueshme.
