Pas sherrit mes dy efektivëve të shërbimit të policisë Rrugorre në komisariatin e Elbasanit, edhe në Tiranë është regjistruar një episode dhune midis efektivëve të Uniformave Blu.
Mësohet se një efektiv i repartit “Shqiponja” ka goditur me grusht një efektiv të policisë Rrugore, me ngjarjen që ka ndodhur në afërsi të shkollës “Sami Frashëri”, në rrugën e Barrikadave.
Punonjësi i forcave “Shqiponja” me iniciale Y.D po lëvizte më një automjet, kur punonjësi i qarkullimit i ka bërë me shenjë të ndalojë, por ai nuk i është bindur fillimisht urdhërit.
Pavarësisht kësaj, më pas efektivi i “Shqiponjave” ka ndaluar dhe ka goditur me grusht efektivin e Rrugores.
Pas sherrit, punonjësi i Shqiponjave është larguar nga vendngjarja por për të ka nisur një hetim nga Agjencia e Mbikëqyrjes Policore. Gjithashtu Drejtorit të Policisë së Tiranës, Tonin Vocaj vetëm një javë pasi mori detyrën i është dashur të marrë vendimin për ta pezulluar efektivin e dhunshëm të repartit “Shqiponja”.
Njoftimi i policisë:
Në lidhje me një lajm të publikuar në portale që bën fjalë për një konflikt të ndodhur mes një punonjësi të Komisariatit Rajonal të Policisë Rrugore dhe një punonjësi të Forcës së Posaçme “Shqiponja”, ju informojmë se:
Drejtori i Drejtorisë Vendore të Policisë Tiranë ka bërë pezullimin e menjëhershëm nga detyra të punonjësit të Policisë, shtetasit Y. D., punonjës Policie pranë Forcës së Posaçme “Shqiponja”, pasi:
Në rrugën e Barrikadave, punonjësi i Policisë së Qarkullimit Rrugor, shtetasi N. H., ka konstatuar në parakalim të gabuar dhe me xhamat e errësuar automjetin me drejtues shtetasin Y. D., të cilit i ka bërë shenjë ndalimi.
Drejtuesi i mjetit pasi ka ndaluar, është konfliktuar me punonjësin e Policisë, shtetasin N. H., të cilin e ka ofenduar e goditur për shkak të detyrës.
Ndërkohë, Drejtori i Përgjithshëm i Policisë së Shtetit ka urdhëruar Drejtorinë e Standardeve Profesionale në Policinë e Shtetit, për nisjen e hetimit disiplinor për punonjësin e Policisë.
Po në lidhje me këtë ngjarje është duke kryer veprime AMP.
