Elio Hamiti, 17-vjeçari që u përplas mbrëmjen e sotme nga makina tip “Mercedes Benz” e ish-kryebashkiakut të Himarës Vasil Bollano, është transportuar me urgjencë për në spitalin e Traumës në Tiranë.
Aksidenti ndodhi në Llogara, me 17-vjeçarin që u godit nga mjeti që drejtohej prej Bollanos, kur ai ishte duke kaluar rrugën për të shkuar tek lokali i gjyshes së tij, i cili ndodhet në afërsi të fushës së sportit.
I mituri ka marrë dëmtime në kokë dhe organet e brendshme, si pasojë e përplasjes së fortë dhe është transportuar fillimisht në spitalin e Vlorës me ndihmën e ambulancës, por gjendja u paraqit e rëndë duke detyruar mjekët të kërkonin transportimin drejt Tiranës.
Mësohet se ai ka pësuar “poli traumë” dhe ndodhet në koma të thellë. Sakaq, 66-vjeçari Bollano u shoqërua në Komisariat, për veprime të mëtejshme hetimore.
Njoftimi i policisë:
Rreth orës 17:00, në Llogara, pranë fushës së sportit, shtetasi V. B., 66 vjeç, banues në Himarë, duke drejtuar automjetin tip “Benz”, ka aksidentuar shtetasin E. H., 17 vjeç, këmbësor në rrugë, i cili ndodhet në spital nën kujdesin e mjekëve.
Drejtuesi i mjetit, shtetasi V. B, u shoqërua në Komisariat, për veprime të mëtejshme.
Grupi hetimor ndodhet në vendngjarje dhe po kryen veprimet e mëtejshme për aksidentin.
