Lionel Messi ka nisur ta shtrojë rrugën e tij drejt lavdisë që fëmijë dhe kjo e ka ndihmuar që t’i përjetojë emocionet e një finaleje qysh në moshën 18- vjeçare.
Që prej vitit 2005 kur ka pasur përballjen e tij të parë me një trofe e deri të dielën kur pati të fundit, “Pleshti” ka luajtur plot 8 finale me fanellën e kombëtares, duke humbur katër e duke fituar po kaq.
BOTËRORI U-20 2005, I FITUAR – Më 2 korrik 2005, Mesi shënonte dy penallti ndaj Nigerisë në stadiumin “Galgenwarhd” në Utreht për të marrë me vete në shtëpi trofeun e Botërorit U-20. Edhe atëherë si në Botërorin e Katarit shënonte në çdo fazë me eliminim direkt.
KUPA E AMERIKËS 2007, E HUMBUR – Shuplaka e parë nuk harrohet kurrë, për më tepër kur për një argjentinas vjen nga Brazili. Golat e Zhulio Baptistës e Dani Alveshit dhe autogoli i Ajalës (sot në stafin e Skalonit), i dhanë mësimin e parë Mesit, që atëherë ishte fenomeni i ri i Barcelonës, gati për të qenë trashëgimtari i Ronaldinjos.
LOJËRAT OLIMPIKE 2008, E FITUAR – Në Pekin, më 23 qershor 2008, argjentinasit iu rikthyen medaljeve të arta. Di Maria shënoi golin e vetëm përballë Nigerisë, duke nisur ciklin që do ta kurorëzonte atë si “njeriun e finaleve”.
Mesi kishte shënuar më parë ndaj Holandës e Bregut të Fildishtë, ndërkohë që skuadrën me yje si Rikelme, Zabaleta e Agurero e drejtonte Baptista, kampion bote në 1986-ën.
BOTËRORI 2014, I HUMBUR – Ndoshta zhgënjimi më i madh. E nis me katër gola në fazën e grupeve pastaj zhduket. Gjermania me Gëtcen i ndëshkon në kohën shtesë të finales me Leon që do të shprehej: “Plagë që nuk do të shërohen kurrë”. Ndoshta të dielën janë kuruar.
KUPA E AMERIKËS 2015, E HUMBUR – Pas Botërorit, Argjentina bie edhe në kompeticionin kontinental përballë Kilit 4-1 me penallti, pas një 0-0 të shëmtuar në 120 minuta. Mesi nuk mbërrin shkëlqimin me klubin.
KUPA E AMERIKËS 2016, E HUMBUR – Në edicionin jubile për 100-vjetorin e kompeticionit, Mesi dhe Argjentina humbin të tretën finale radhazi, përsëri përballë Kilit, përsëri me penallti. Tashmë është nisur të flitet për “mallkimin e finaleve” dhe Mesi që kishte gabuar penalltinë e parë, dorëzohet dhe largohet nga kombëtarja: “Nuk ia dola të fitoj një titull. Për mua mbaron këtu”, më vonë ndryshon mendje.
KUPA E AMERIKËS 2021, E FITUAR – Tabuja e titujve me kombëtaren merr fund më 10 korrik 2021, kur si golashënuesi më i mirë i kompeticionit, Mesi mposht Brazilin në Rio de Zhaneiro. Di Maria vendos ndeshjen dhe në një tempull si “Marakana” lotët e gëzimit u përkasin argjentinasve.
BOTËRORI 2022, I FITUAR – Ëndrra e një jete u realizua në shkretëtirën e Katarit. Të gjithë e kemi të freskët, një finale e çmendur ndaj Francës dhe gol i Mesit në çdo fazë të kompeticionit, me një sërë rekordesh të thyera dhe me një Leo më kapiten se asnjëherë tjetër. Mbërrin përjetësinë.
