Situata e tensionuar në Veri të Kosovës dhe mesazhi i pasdites së sotme nga kryeminiastri Albin Kurti se “barrikada të tilla nuk duhet të tolerohen më gjatë” duket se ka shtyrë KFOR-in që të hidhet në veprim.
Nga pamjet e publikuara së fundmi nga RTV Dukagjini rezulton se mjete të rënda të misionit të KFOR-it janë nisur në drejtim të Mitrovicës. Pajisjet ushtarake janë parë duke lëvizur në rrugën Vushtri-Mitrovicë në ditën e dhjetë qëkur Veriu është barrikaduar nga serbët.
Aktualisht, situata në komunat veriore është e qetë, por rrugët për në pikat kufitare në Bërnjak e Jarinjë vazhdojnë të jenë të bllokuara nga kamionët e serbëve.
Barrikadat vazhdojnë të qëndrojnë ende të palëkundura përkundër thirrjeve ndërkombëtare që ato të hiqen menjëherë.
Kryeministri i Kosovës, Albin Kurti, ka thënë se ministri i Punëve të Brendshme, Xhelal Sveçla, është duke qëndruar gjatë tërë kohës në Mitrovicë, dhe është në kontakt të vazhdueshëm me KFOR-in.
Por, sipas Kurtit, KFOR-i ka kërkuar edhe pak kohë nga institucionet e Kosovës për heqjen e barrikadave.
