Një operacion shpëtimi është duke u zhvilluar momentalisht pasi një varkë e vogël e cila dyshohet se po transportonte emigrantë të paligjshëm është përmbytur në Kanalin anglez pranë Kentit, raporton The Sun.
Lajmin e dha Agjencia Detare dhe Rojet Bregdetare.
“Rojet bregdetare aktualisht po koordinojnë operacionin pas incidentit të një varke të vogël jashtë Kentit, duke punuar me Marinën, Forcën Kufitare, Policinë e Kentit dhe partnerë të tjerë”, njoftoi një zëdhënës i Agjencisë Detare britanike.
Ai shtoi: “Ne kemi dërguar varkat e shpëtimit Dover, Dungeness, Hastings dhe Ramsgate RNLI dhe ekipet e shpëtimit të rojës bregdetare Deal, Dungeness dhe Folkestone, së bashku me komandantin e zonës së rojes bregdetare”.
Anijet e përfshira në kërkim përfshijnë dy varka shpëtimi RNLI, varkën patrulluese të Marinës Mbretërore HMS Severn, dy anije peshkimi dhe një patrullë të rojes bregdetare franceze.
Nuk dihet nëse ka edhe emigrantë shqiptarë në gomonen që është përmbysur në mes të Kanalit rreth orës 03:40 të mëngjesit kur temperatura ka zbritur sipas mediave britanike në -3 gradë celcius.
Lidhur me ngjarjen ka reaguar edhe një zëdhënës i qeverise se Mbretërisë së Bashkuar.
“Ne jemi në dijeni të një incidenti në ujërat e MB dhe të gjitha agjencitë përkatëse po mbështesin një përgjigje të koordinuar. Detaje të mëtejshme do të jepen në kohën e duhur”, tha ai sipas Skynews.
Ndërkohë, autoritetet franceze kanë njoftuar mediat se po përpiqen të shpëtojnë një numër emigrantësh të mbetur në det në anën britanike të Kanalit.
Prefektura detare franceze shtoi se shërbimet e shpëtimit po ndihmonin autoritetet britanike.
“Një helikopter francez dhe një varkë e marinës po ndihmojnë në operacionin e kërkim-shpëtimit”, tha një burim francez për agjencinë e lajmeve Reuters.
