Deputetja demokrate Albana Vokshi deklaroi këtë të Hënë nga foltorja e parlamentit se kryeministri Edi Rama është njeriu që ushton më shumë dhunë në këtë vend.
Vokshi tha se Rama u bën presion direkt pronarëve të mediave si dhe dhunon qytetarët.
“Dhuna ka vetëm një emër: ai është Edi Rama”, tha Vokshi.
“Akoma më i rëndë është presion ndaj mediave për të shitur mediat te qeveria. Ky model dhune nxitet nga Edi Rama. Nxitësi kryesor i dhunës është Edi Rama. Në Kuvend opozita dhunohet në të drejtën e saj dhe kërkohet që ajo të asgjësohet. Në këtë klimë dhune politike edhe një grup i vogël deputetësh kërkojnë të rrëmbejnë simbolet e PD. Në këtë mjedis dhune qytetari i thjeshtë ndihet i pashpresë. Dhuna ka vetëm një emër. Ai është Edi Rama. Ai akuzohet për nxitjen e dhunës ndaj liderit të opozitës, Sali Berisha. Në Shqipëri gjendja sa vjen dhe bëhet më e rëndë. Zgjidhja është të largojmë Edi Ramën dhe ta çlirojmë Shqipërinë nga dhuna. Me dhunën e korrupsionit ka blerë votat dhe ka përzënë shqiptarët nga shtëpitë e tyre. Por i ka bërë llogaritë gabim. Asgjë nuk do jetë më si më parë. Opozita do i shkojë deri në fund misionit të saj”, shtoi Vokshi.
“Në zgjedhjet e ardhshme qytetarët ta mbajnë mend se Edi Rama është një hakmarrës”, vijoi ajo.
