Kur mbeten pak më shumë se 48 orë nga nisja e turit të tij ballkanik, Këshilltari i lartë i Departamentit të Shtetit, Derek Chollet ka deklaruar hapur se Shtetet e Bashkuara besojnë se bisedimet mes Kosovës dhe Serbisë do të çojnë në njohje reciproke.
Në një prononcim për mediat ai tha se dialogu që ndërmjetësohet nga Bashkimi Evropian, është “element kritik” në rrugën e Kosovës drejt integrimeve evropiane.
“Ne duam ta shohim Kosovën të vazhdojë në rrugën drejt integrimit më të madh evropian dhe një nga mesazhet që doli nga takimi shumë i rëndësishëm i nivelit të lartë mes Ballkanit Perëndimor dhe BE-së në Tiranë, i pari i këtij lloji që mbahet në rajon, ishte një angazhim i ripërtërirë i Bashkimit Evropian për ta çuar më tej këtë integrim. Ne i konsiderojmë bisedimet e drejtuara nga BE-ja mes Serbisë dhe Kosovës, si një element kritik në këtë drejtim. Ne jemi të përqendruar te normalizimi me bazë njohjen e ndërsjellë. Por, ne besojmë se bisedimet mund të çojnë në këtë hap dhe Kosova të mund të vazhdojë në rrugën e integrimit drejt Evropës”, u shpreh zyrtari i lartë amerikan.
I pyetur për propozimin franko-gjerman për zgjidhjen e mospajtimeve mes Kosovës dhe Serbisë, Chollet tha se për këtë do të flasë me zyrtarët në Prishtinë.
Chollet, së bashku me të dërguarin e posaçëm të SHBA-së për Ballkanin Perëndimor, Gabriel Escobar, të hënën do të nisin vizitën dyditore në Kosovë.
Më pas ata do të qëndrojnë edhe në Serbi e vende të tjera të rajonit, duke shmangur Shqipërinë.
