Pasi ka zbritur nga kullla e TEC-it në Kuçovë, Elona Bregu është transportuar në spital për të marrë ndihmë mjekësore dhe më pas është shoqëruar në komisariat ku ka dhënë dëshminë e saj.
“Shërbimet e Policisë së bashku me negociatorin e Forcave Renea, në prani dhe të psikologes, pas disa orësh negociata bënë të mundur që shtetasja e lartëpërmendur rreth orës 18.40 të zbriste nga kulla e Tec-it pa pasur problem për jetën”, njoftoi Policia.
Burime të sigurta nga Policia lokale thanë për “SYRI.net” se si shkak i hipjes në kullën e TEC-it, ajo ka thënë se e kanë hequr nga puna.
Por firma sipërmarrëse e pastrimit të qytetit ku punon 32-vjeçarja, e kontraktuar nga bashkia, ka bërë me dije se ajo nuk është hequr nga puna, por është transferuar në turnin e tretë. Sipas urdhrit të ri, duhet të punonte natën në pastrimin e rrugëve të qytetit naftëtar. Këtë e konfirmoi edhe kryetari i Bashkisë së Kuçovës Selfo Kapllani, i cili tha se Elona Bregu nuk ishte pushuar nga puna.
Elona Bregu është e martuar dhe ka dy fëmijë. Para 10 vjetësh, edhe bashkëshorti i saj veproi po njësoj: Kërcënoi se do të hidhej nga e njëjta kullë. Fqinjët tregojnë për “SYRI.net” se familja e saj jeton në varfëri dhe bashkëshorti i 32-vjeçares kurohet për shkak se vuan nga sëmundje mendore.
Disa vite më parë, të dy, burrë e grua, braktisën dy fëmijët e mitur para portës së bashkisë me argumentin se nuk kishin mundësi që ti ushqenin. Fëmijët u çuan në një jetimore në Elbasan, ndërsa më vonë, çifti i rimori sërish në shtëpi.
