Në sheshin para stadiumit “Air Albania” dhe zonën përreth po vijojnë përgatitjet për samitin e përbashkët midis liderëve të Bashkimit Europian dhe Ballkanit Perëndimor.
Punimet e samitit ku do të marirn pjesë 44 delegacione do të fillojnë rreth orës 9:15, ndërsa mësohet se kryeministri Edi Rama do t’i presë homologët e tij në ambientet e “Air Albania”.
Ndërkohë, siç është raportuar më herët gjatë ditës Policia e Shtetit ka marrë masa të shumta sigurie, duke angazhuar rreth 1500 policë në terren dhe “paralizuar” nyjet kryesore të qarkullimit në Tiranë.
Me kryeqytetin që prej pasdites së sotme pritet të jetë në “shtetrrethim” për garantimin e sigurisë së personaliteteve të larta europiane pjesëmarrëse në Samit, duket se problemi i vetëm që qeveria nuk e kishte llogaritur është protesta që ka thirrur Partia Demokratike.
Edhe pse perimetri i sigurisë që nis me stadiumin “Air Albania” e vazhdon me Pallatin e Kongreseve dhe Kryeministrinë e Kryesinë e Kuvendit, lideri i opozitës Sali Berisha sfidoi Policinë sot teksa tha sërish sot se do të jetë bulevardi “Dëshmorët e Kombit” vendi ku do të zhvillohet tubimi.
“T’i dëshmojmë lidershipit europian që në atë Samit e ka pushtetin të ngritur mbi dhunimi e vetës së shqiptarëve, drogën, trafiqet mbi narkoshtetin që ka ndërtuar në Shqipëri. E ka karrigen e tij të ngritur mbi vjedhje të paimagjinueshme për një vend europian. Ai aty ulet si kryeministri i Shqipërisë, por gjithashtu edhe si hajduti i Shqipërisë. Hajduti i parë i Shqipërisë do të jetë Edi Rama në atë Samit”, tha Berisha sot në konferencë për mediat.
Ndërkohë, shefi i Organizimit në Partinë Demokratike, Klevis Balliu ka zbuluar për News24 detaje nga mënyra si është organizuar tubimi dhe zbuloi sesi qytetarët do të arrijnë të hyjnë në bulevard, në kushtet e një perimetri sigurie te ngritur nga forcat e rendit.
Tubimi sipas tij do të nisë 2 orë pasi të startojnë zyrtarisht punimet e Samitit. Balliu theksoi se protestuesit do të vijnë më parë se sa të nisë shtetrrethimi në kryeqytet dhe se nuk do të dalin nga fjala e dhënë dhe do të protestojnë në bulevardin “Dëshmorët e Kombit”.
“Protesta është nesër. Protesta do të mbahet në orën 12:00 dhe qytetarët duhet të vijnë më herët, edhe për shkak të sigurisë, pasi ne respektojmë protokollet e sigurisë. Qytetarët do të vijnë më herët, edhe për shkak të sigurisë. Ne respektojmë protokollin e sigurisë që ka policia për liderët e BE, që të jenë të bindur se vend dhe popull më pro evropiane se shqiptarët s’gjejnë në asnjë vend. Ne do respektojmë çdo normë, por jo provokimet dhe ekzagjerimet. Jo të bllokosh Durrësin se është samiti në Tiranë. Justifikimi se është siguria e tyre dhe protesta duhet larguar, e thash ata janë një mijë herë më të sigurt se janë më të sigurt që ta bëjnë samitin në protestë se para Ramaçiçit dhe Vuçiçit. Protesta do të jetë në Bulevard. Do ketë podium, do të jenë të gjitha, rëndësia themelore është mesazhi. Ka rëndësi shumë se dëgjoj disa analistë që ose paguhen shumë, ose nuk marrin vesh nga e vërteta. Rëndësia e protestës do të jetë mesazhi i saj dhe e vërteta. Nuk kemi vendosur se sa orë do protestojmë”, u shpreh Balliu.
Më tej ish-deputeti demokrat shtoi se Samiti BE-BP më mirë të mbahej mes protestuesve, pasi sipas tij atje liderët e BE-së do të ndiheshin më të sigurt sesa nën mbrojtjen e policisë së lidhur me krimin.
“Samiti do të ishte mirë të bëhej mes protestuesve. Sepse ata janë shumë më të sigurt që ta bëjnë protestën mes qytetarëve. Aty do të ishin më të mbrojtur. Kush do i mbrojë ata? Policia që shoqëronte Ervis Martinajn? Europianët duhet të dinë se çfarë bëhet me fondet që ata sjellin këtu, sepse shqiptarët s’po marrin asnjë kacidhe. Kush mund t’i vjedhë tjetër taksat e BE-së që vijnë këtu? Vetëm Edi Rama. Do të ketë edhe fjalime në gjuhë të huaj veç banderolave”, deklaroi ai.
