Festa e Pavarësisë u mbyll me një koncert të Dua Lipës në Sheshin Skënderbej.
Ndërsa sot, Shqipëria feston (sërish e ndarë politikisht) Ditën e Çlirimit. Këtë datë politika e feston të ndarë, pasi e djathta feston 28 nëntorin si ditën e Pavarësisë dhe të Çlirimit, ndërsa 29 nëntori është festë vetëm për të majtën.
Ceremonia zyrtare zhvillohet pranë Varrezave të Dëshmorëve të Atdheut, ku vendosen kurora me lule pranë memorialit të Nënës Shqipëri. Në të morën pjesë Presidenti Bajram Begaj, kryeparlamentarja Lindita Nikolla dhe deputetë e zyrtarë vendorë socialistë. Në ceremoni mungoi kryeministri Rama, arsyeja ende nuk dihet.
Para nisjes së ceremonisë zyrtare, te Varrezat e Dëshmorëve u shfaqen si çdo vit edhe idhtarët e diktatorit Enver Hoxha, të cilët vendose pankarta dhe buqeta me lule në hyrje të varrezave.
Ndërkohë, kreu i grupit të Partisë Socialiste, Taulant Balla, i shoqëruar nga deputeti Arben Pëllumbi kanë mbërritur në ambientet e Dhomave Speciale të Gjykatës së Hagës, ku mbahen prej muajsh tashmë drejtuesit kryesorë të luftës së UÇK. Këtë vizitë kreu i grupit të PS, Balla e paralajmëroi më herët gjatë punimeve të përbashkëta të dy kuvendeve të Shqipërisë dhe Kosovës që u mbajt në Tiranë.
