Lefter Maliqi është kandidati që do të përfaqësojë opozitën në Kuçovë, në zgjedhjet e ardhshme lokale.
Më 11 Nëntor, Partia Demokratike njoftoi zyrtarizmin e dy kandidatëve në primaret për Kuçovën: Lefter Maliqi dhe Brikena Koroveshi.
Por, Koroveshi është tërhequr. Këtë e bën me dije vetë Maliqi përmes një postimi në rrjetet sociale këtë të Hënë.
“Demokracia ka nevojë për akte demokratike. Sa kohë janë të tilla, japin veç vlerë. Sapo mësova se kolegia ime, garuesja tjetër në procesin e primareve të PD-së në Bashkinë Kuçovë, ka dhënë dorëheqjen duke zgjedhur tërheqjen nga gara. S’më mbetet gjë tjetër, veçse ta uroj mësuesen e nderuar, sekretaren e degës Kuçovë, zonjën Brikena Koroveshi, për aktin qytetar e dinjitioz përballë demokratëve dhe opozitarëve”, shkruan ish-deputeti.
“Unë ftoj të gjithë demokratët, opozitarët dhe simpatizantet të marrin pjesë në procesin e votimit me 4 Dhjetor tek dega PD Kuçovë, për të shprehur dëshirën dhe zgjedhjen e tyre me votë, edhe kur në garë mbetet vetëm një kandidat. I bindur për t’i kthyer qeverisjen vendore sot, dhe atë qendrore nesër, qytetarëve… me respekt Lefter Maliqi”, përfundon ai.
