Partia Demokratike i ka dërguar një letër kryetares së Kuvendit të Shqipërisë, Lindita Nikolla lidhur me miratimin e marrëveshjes për Portin e ri të Durrësit.
PD në kërkesë shprehet se për diskutime janë përcaktuar vetëm 6 orë, ndërsa që çdo deputeti i bie jo më shumë se sa 2 minuta e 57 sekonda. Aty thuhet se ky port është më i rëndësishmi i vendit dhe ka një rëndësi strategjike jo vetëm për vendin, por edhe për rajonin.
Në letër thuhet se koha e diskutimit për këtë çështje nuk mund të shkurtohet, por është e nevojshme një debat publik duke i lejuar çdo deputeti që të flasë për këtë çështje kombëtare.
Kështu PD kërkon që të hiqet ky kufizim kohor dhe së paku çdo deputet të flasë 10 minuta, ashtu sikurse e parashikon rregullorja e Kuvendit.
Dita e nesërme pritet ta kthejë Kuvendin një “arenë” përballje mes opozitës dhe mazhorancës. Prej disa ditësh e gjithë vëmendja politike është përqendruar në projektin e Portit të Durrësit pasi opozita e konsideron si një mega-aferë që pasuron klientët e qeverisë Rama.
