Në Britaninë e Madhe shqetësimi po përhapet në masë të gjerë për një ‘epidemi të tmerrshme’, e cila po lind pasi të rinjtë gjithmonë e më tepër po përdorin cilindra gjigantë të oksidit të azotit, një lëndë e njohur gjerësisht si “gazi i të qeshurave” për t’i dhënë jetë festave të tyre, përveç lëndëve narkotike.
“Gazi i të qeshurës” po bëhet gjithnjë e më popullor sipas ekspertëve, por problemi është se disa të rinj që kanë thithur substancën, e cila shkakton një ndjenjë euforie, relaksi dhe shkëputjeje nga realiteti, kanë mbetur me dëmtim të shtyllës kurrizore, plasje të mushkërive dhe të paaftë për të ecur.
Duke marrë parasysh përhapjen e gjerë në Tik Tok dhe mediat e tjera sociale, ata që janë ndikuar negativisht nga trendi kanë paralajmëruar vazhdimisht për rreziqet.
25-vjeçarja Kerry Donaldson nga Newham i Londrës, dikur një recepsioniste zbuloi në korrik 2022 se si qejfet e saj ‘hippy crack’ dëmtuan palcën e saj kurrizore dhe e detyruan të lëvizë me karrige me rrota.
Alex Littler nga Cheshire u dërgua gjithashtu me urgjencë në spital më 20 qershor të këtij viti pasi u ankua për qafën e ënjtur, gulçim dhe se gjoksin e ndiente si flluskë, kur “gazi i të qeshurave” i shkaktoi plasjen e mushkrisë.
Studenti u detyrua t’u rrëfejë mjekëve dhe nënës se kishte thithur oksid azoti ose ‘nos’ gjatë fundjavës, ndërsa ishte në festivalin muzikor Parklife në Heaton Park, Mançester.
Sipas agjencisë së monitorimit të barnave të Bashkimit Evropian EMCDDA, përdorimi rekreativ i oksidit të azotit është në rritje në Evropë tek të rinjtë, duke prodhuar shifra shqetësuese të helmimeve.
“Popullariteti në rritje i substancës rrjedh nga disponueshmëria e gjerë e saj pa recetë, çmimi i ulët, lehtësia e përdorimit dhe perceptimi i rremë se është i sigurt”, tha agjencia me bazë në Lisbonë.
Sipas EMCDDA në Mbretërinë e Bashkuar, oksidi i azotit është droga e dytë më e përhapur midis të rinjve të moshës 16 deri në 24 vjeç pas kanabisit.
