Grupi “Homeland Justice” ka publikuar këtë të Dielë në “Telegram” dy skeda me të dhënat personale të nëndrejtorit të SHISH, Oljan Kanushit, dhe drejtorit të Përgjithshëm të Policisë së Shtetit, Muhamet Rrumbullakut.
Në skeda gjenden informacione mbi përbërjen familjare, të dhënat e letërnjoftimeve dhe pasaportave, numrat e celularit, vendbanimi, një listë me hyrje-daljet nga territori i vendit, pikat e kalimit, datat kur është kaluar kufiri dhe dokumentet që ka paraqitur te autoritetet doganore.
Nga viti 2005 deri në prill të vitit 2021, Muhamet Rrumbullaku ka dalë 45 herë jashtë vendit. Katër prej fluturimeve, Rrumbullaku rezulton t’i ketë kryer me charter.
Ndërsa Oljan Kanushi ka dalë nga vendi plot 95 herë nga viti 2004 deri në prill të këtij viti. Shumicën e lëvizjeve i ka me makinë nga pika të ndryshme kufitare. Ajo që bie në sy është se 6 herë ka kaluar kufirin në këmbë, drejt Greqisë. Hera e fundit është regjistruar në vitin 2012 nga pika kufitare e Kapshticës. 
Gjithashtu, në dosje shihet se të dy disponojnë 2 automjete në emrin e tyre. Konkretisht Rrumbullaku zotëron dy autovetura, ndërsa Kanushi një autoveturë dhe një automjet për transport të veçantë.
