Rusi i fundit u largua nga Khersoni që u shpall i pavarur edhe nga vetë presidenti Volodymyr Zelensky, por ukrainasit e dyshuar si bashkëpunëtor me ushtrinë e Vladimir Putin po përjetojnë ditët e tyre më të zeza që nga fillimi i luftës.
Ushtria ukrainase dhe banorët e rajoneve të çliruara u janë qepur atyre pas për t’i vendosur përpara përgjegjësisë.
Disa imazhe të fundit që duket të jenë në Kherson tregojnë bashkëpunëtorët me duart e lidhura dhe sytë e mbuluar me shirita, të rreshtuar para një muri nga banorët e zonës.
Bashkëpunëtorët e dyshuar të Rusisë duken me fytyra të përgjakura dhe kokat e tyre të varura në shenjë dëshpërimi.
Individët gjithashtu duket se janë etiketuar me fjalë si “tradhtar” të shkruara në shiritat që mbulojnë sytë e tyre.
Ndërkohë, raportohet se shumë të tjerë nga ata që bashkëpunuan me rusët pasi ata pushtuan Khersonin në fillimin e luftës në mars, janë larguar nga qyteti në javët e fundit.
Edhe pse ka pasur gëzim për çlirimin, ekziston frika se disa rusë janë ende të pranishëm në qytet dhe në zonën përreth. Zyrtarët e inteligjencës kanë paralajmëruar banorët se ata mund të vishen me rroba civile për të shmangur kapjen.
