Me 11 urdhër-arreste të lëshuara dhe 5 arrestime të kryera, mes të cilëve vënia në pranga edhe e biznesmenit dhe njëherësh zyrtarit të FSHF-së, Arben Dervishaj, SPAK ka “zbërthyer” sot skemën e vjedhjes me inceneratorin e Fierit.
Sipas organit të akuzës vjedhja e miliona eurove nga fondet publike është realizuar përmes lëshimit të faturave.
Në kuadër të hetimeve të këtij procedimi penal, me kërkesë të Prokurorisë së Posaçme kundër Korrupsionit dhe Krimit të Organizuar Tiranë, Gjykata e Posaçme e Shkallës së Parë për Korrupsionin dhe Krimin e Organizuar Tiranë miratoi më 11 nëntor 2022 masën sigurimi personale, nga të cilat 10 (dhjetë) masa sigurie “arrest në burg” dhe 1 (një) masë sigurie “arrest në shtëpi”.
Në këtë njoftim mësohet se ish-deputeti socialist Alqi Bllako gjatë kohës që ka shërbyer në fillim si Sekretar i Përgjithshëm i Ministrisë së Mjedisit dhe më pas Drejtor i Përgjithshëm i Agjencisë Kombëtare Ujësjellës Kanalizime dhe Infrastrukturës së Mbetjeve (AKUM), ka favorizuar shoqërinë koncesionare “Integrated Technology Ëaste Treatment Fier” sh.p.k., kundrejt propozimit dhe marrjes në mënyrë të tërthortë të përfitimit të parregullt në shumën prej 14,964,900 (katërmbëdhjetë milion e nëntëqind e gjashtëdhjetë e katër mijë e nëntëqind) lekë.
“Kjo vlerë përfitimi është siguruar në trajtën e pagës së dhënë babait të tij, Edmond Bllako, duke e paraqitur si i punësuar “Drejtor Kantieri” tek shoqëria koncesionare e ndërtimit të Inceneratorit të Tiranës “Integrated Energy BV SPV” sh.p.k, në pagën mujore 6000 (gjashtë mijë) euro, pagesa të realizuar për periudhën tetor 2018 deri në janar 2020”, thuhet në njoftimin e SPAK.
Rezulton se administratorët e shoqërisë koncesionare “Integrated Energy BV SPV” (ku edhe këtu shtetasi Alqi Bllako ka patur rolin e tij në funksionin e Sekretarit të Përgjithshëm të Ministrisë së Mjedisit) nëpërmjet veprimeve të kundraligjshme të tyre, e kanë pasqyruar si të punësuar shtetasin Edmond Bllako, që është babai i ish-deputetit të PS.
Sipas Prokurorisë së Posaçme, kompania në fjalë ka bërë pagesa fiktive për Edmond Bllakon, pasi rezulton e provuar se këto pagesa janë përfitime të parregullta nga i biri i tij Alqi Bllako.
