Një operacion policor i kryer nga struktura “Shqiponja’ e policisë së Tiranës në zonën e Qafë-Kasharit mesditën e sotme, ka çuar në ndalimin e Ramazan Rrajas, nipit të deputetit të Partisë Socialiste në Krujë, Rrahman Rraja.
Operacioni është kryer pas dyshimeve se persona të ndryshëm lëviznin me mjete të blindura dhe me armë.
Gjatë aksionit janë bllokuara dy automjete tip “Audi” dhe një “Benz-Mercedez”, që dyshohet se janë të blinduara.
Sa i përket Ramazan Rrajas, ai nuk është një emër i panjohur për policinë, pasi në muajin gusht të 2020 ka dhunuar barbarisht një grua në ambientet e jashtme të QSUT, me pamjet që u bënë virale në rrjet.
Ai gjithashtu u rikthye në qendër të vëmendjes pas publikimit të një video ku shfaqet në një lokal në Fushë-Krujë me kallashnikov, duke terrorizuar klientët. Pas publikimit të lajmit, Rraja, nga Dubai mohoi të kishte qenë ai, duke thënë se policia merr ryshfet për të terrorizuar familjen e tij.
Ai u arrestua në dhjetor 2020 nga një operacion ndërkombëtar për shkatërrimin e bandës së kokainës, si drejtues i një grupi trafikantësh që çoi në pranga 6 shqiptarë dhe 2 të huaj.
Të arrestuarit ne Belgjikë ishin Musa Gjikola, Genti Balliu i njohur ndryshe edhe si Flamur Balliu, Ramazan Rraja, Fioralb Rraja, Bledar Pepaj dhe Fatmir Xhecuka.
Sipas dosjes së prokurorisë belge, banda trafikonte kokainë nëpërmjet Antëerp-it dhe më pas e shpërndante në të gjithë Europën Perëndimore si dhe në Turqi e deri në Australi.
Sipas policisë, në periudha të ndryshme gjatë vitit 2019 dhe 2020 janë sekuestruar rreth 232 kilogramë kokainë, një armë zjarri pistoletë, si dhe rreth 200 mijë euro. Ky grup kriminal ngarkonte drogën në kontenierët e bananeve nga Amerika Latine drejt Holandes, Belgjikes dhe Gjermanise. Ata vendosnin paisje gjurmuese dhe kur malli mbërrinte në europë, ata organizonin sulme të armatosura duke grabitur drogën.
Ndërkohë, prokuroria antikorrupsion ka nisur edhe një hetim për pasurinë e shqiptarëve të arrestuar, pasi dyshohet se këto para janë pastruar në Shqipëri.Hetimet fillestare ndaj kësaj organizate kriminale nisën dy vjet më parë, kur agjentët antidrogë sekuestruan rreth 1 ton kokainë gjatë operacionit të koduar “Paraguaj”.
Ramazan Rraja u lirua nga burgu në maj të 2021 me vendim të gjykatës belge.
Ai gjithashtu u përfol për përfshirje në masakrën e Fushë-Krujës, ku u vranë Brilant Martinaj, Besmir Hoxha dhe Diklen Vata, por reagoi asokohe për mediat dhe mohoi përfshirjen.
“Nuk kam asnjë lidhje me krimin, ndodhem jashtë vendit. Për shtatë muaj në Shqipëri kam qëndruar vetëm 3 ditë kur kam vizituar familjen. Policia po më sulmon qëllimisht, më akuzon padrejtësisht për çdo krim”, tha Rraja asokohe.
