Frika dhe ankthi kanë mbërthyer Stambollin mesditën e kësaj të diele, teksa një shpërthim i fortë është regjistruar në qendër të qytetit, në rrugën me të njohur për turistët falë njësive tregtare.
Shpërthimi në bulevardin Taksim ndodhi në orën 15:20, ndërsa prefekti i qytetit turk, Ali Yerlikaya, njoftoi përmes Twitterit se ka të vdekur dhe të plagosur.
“Për një arsye të panjohur ka ndodhur një shpërthim para një dyqani në rrugën Beyoğlu Istiklal. Zjarrfikësit nga Beyoğlu dhe Şişli janë dërguar në vendngjarje. Sipas raportimeve të para, nga shpërthimi kanë humbur jetën 5 persona dhe 38 janë plagosur“, shkruan ai.
Nuk dihet ende se cili ishte shkaku i shpërthimit, por autoritetet e Ankarasë nuk e përjashtojnë një sulm të mundshëm terrorist.
istiklal caddesi’ndeki patlama anı pic.twitter.com/3fM5KRQLWW
— fırat (@firatfstk) November 13, 2022
Rruga ku ndodhi shpërthimi është më e njohura në Stamboll, e mbushur me bare dhe restorante dhe e populluar nga shumë të huaj.
Në vendngjarje kanë mbërritur shumë ambulanca, zjarrfikëse dhe policë, ndërsa hyrjet dhe daljet e bulevardit janë bllokuar dhe banorët janë evakuuar.
Ndërkohë video e shpërthimit që tregon tym dhe flakë në ajër është publikuar në Twitter.
Në një video, të postuar ndër të tjera nga Fadi Al-Qadi, avokat dhe aktivist i të drejtave të njeriut, mund të shihen njerëzit e shtrirë në tokë, të prekur nga shpërthimi.
Gazetari Mehmet Karataş bëri gjithashtu një lidhje nga një pikë tjetër në zonë, duke thënë: “Shpërthimi ndodhi në ndërtesën numër 190 në Istiklal. U morën masa të forta sigurie. Pyetja e vërtetë që pret një përgjigje këtu është: ‘A është ky një sulm terrorist?’ Njësitë e sigurisë vazhdojnë punën intensivisht. Ka të lënduar”.
