Seksioni për Hetimin e Krimeve Ekonomiko-Financiare ka vijuan punën për evidentimin dhe goditjen e paligjshmërive në fushën e krimit ekonomik.
Uniformat blu kanë goditur 3 raste të tregtimit të dhjetëra stekave me cigare, të kontrabanduara dhe kanë vënë në pranga tre shtetas.
“Si rezultat, kanë evidentuar dhe goditur 3 raste të kontrabandës së mallrave. Në vijim të veprimeve për këto raste, u bë arrestimi në flagrancë i shtetasit A. M., 34 vjeç, banues në Tiranë dhe u proceduan penalisht shtetasit I. D., 31 vjeç, A. M., 35 vjeç, të dy banues në Tiranë. Gjatë kontrolleve të ushtruara nga shërbimet e Policisë, në automjetet që këta shtetas drejtonin, shërbimet e Policisë kanë gjetur dhe kanë sekuestruar në cilësinë e provës materiale, dhjetëra steka me paketa me cigare, të dyshuara të kontrabanduara”, njofton policia.
Gjithashtu është goditur një rast i vënies së basteve sportive nëpërmjet celularit në një lokal të paregjistruar në organet kompetente. Për rastin në fjalë uniformat blu nisën procedimin penal për shtetasin G. H., 22 vjeç, banues në Tiranë.
“Gjatë kontrollit të ushtruar në lokalin e shtetasit G. H., në rrugën “Medar Shtylla”, u konstatua se ky shtetas nuk e kishte regjistruar këtë aktivitet në organet kompetente. Në vijim, shërbimet e Policisë, gjetën në aparatin celular të 22-vjeçarit, faqe online që shërbenin për vendosjen e basteve sportive”, thuhet në njoftim.
Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme procedurale.
