Përfaqësuesi i Lartë i Bashkimit Europian, Josep Borrell, u ka thënë kryeministrit të Kosovës, Albin Kurti, dhe presidentit të Serbisë, Aleksandar Vuçiç, se është tepër e rëndësishme që palët të shmangin retorikat që ndezin gjakrat dhe veprimet e njëanshme.
Pas takimeve që kreu veçmas me Kurtin e Vuçiçin, zyra e tij e shtypit citon Borrell të ketë thënë: “Me luftën në Ukrainë, Europa nuk mund të ketë një tjetër konflikt në tokën e saj. Është përgjegjësia e palëve që ta shmangin këtë për të mirën e popujve të tyre, që do të humbisnin më shumë se kushdo tjetër nëse sjellja e tanishme nuk ndryshon”.
Borrell gjithashtu citohet të ketë thënë: “Serbët e Kosovës duhet të kthehen menjëherë në institucionet e vendit dhe të rifillojnë detyrat dhe Kosova duhet të ravijëzojë veprimet e saj mbi targat sipas marrëveshjeve të mëparshme dhe të nisë bisedimet për themelimin e Asociacionit/Komunave me shumicë serbe pa vonesë. Këto detyrime, të marra në kuadër të Dialogut, mbeten të vlefshme dhe të detyrueshme”.
