Në Kuvend vijojnë diskutimet mes palëve sa i përket buxhetit të vitit 2023 dhe paketës së re fiskale që ka propozuar qeveria.
Seanca nisi me përplasje të forta mes opozitës dhe kryeministri Edi Rama pas kalimit me procedurë të përshpejtuar të marrëveshjes për portin e Durrësit në rendin e ditës nga ana mazhorancës, ndërsa ka vijuar me akuza dhe kundërakuza.
Deputeti i PD, Saimir Korreshi gjatë fjalës së tij e ka vendosur theksin te fakti se varfëria është ulur këmbëkryq në vend dhe qeveria që thotë se ka rritur rrogën, në të vërtetë ka rritur vetëm çmimin e bukës.
“Buxheti më i madh historik, ndaj ka shumë persona në sallë. Ishallah ka orarin e prerejes së thonjve dhe ndaj ka ikur. Kjo është dita më e zezë e fukarallikut. Tha kolegia se buxheti nuk është thjesht shifër, toberstafulla, qenka dhe politikë. Gënjeni, kur thoni se keni rritur rroga, keni rritur vetëm bukën, e dini se sa janë rrogat në Lushnje? 250 mijë lekë të vjetra, sfidoj secilin nga ju që të mbajnë në xhep aq lekë”, tha ai.
Duke ironizuar rrahjen e gjoksit nga ana e kryeministrit Edi Rama se qeveria po mbron biznesin e vogël nga taksat dhe abonentët familjarë nga shtrenjtimi i energjisë, Korreshi i kujtoi qeverisë se në Tiranë janë bërë të papërballueshme çmimet e qerasë dhe një student nuk konsumon dot as një sufllaqe për shkak të çmimeve të larta.
“Se në Tiranë, studentët kanë 700 mijë lekë vetëm konviktet, e dini ju se këto rroga sidomos mësuesit i keni degdisur. Ju thoni se biznesi po bën namin. Çfarë biznesi po bëni ju, kostot janë trefishuar. Biznesi është në ditën e tij më të zezë, biznesi nuk po gjen punëtorë, se rrogat janë mizerabël. Në të shumtën e rasteve nuk u paguhen sigurimet. Profesionet e lira po i ngulni nga një taksë tjetër. Arsimi, ku është arsimi? Sa degë janë mbyllur? Se ne harrojmë që t’i akreditojmë universitetet tona. Se harrojmë ne se duam një lek. Kjo është, pse ikin, se Italia investon tek studenti, ai që është me rezultate të mira merr bursë, se këtu as sufllaqe nuk ha dot”, nënvizoi deputeti demokrat.
