Shqiptari 51-vjeçar, Ylli Mera, u gjet i vdekur në malet Kerdylia, pranë Arethousa, Selanik. Trupi i tij u gjet në një zonë të masivit malor, nga efektivët e policisë që ishin në kërkim të tij, pas aktivizimit të shërbimit të “Signal Alert”.
Mera ishte denoncuar i zhdukur më 4 nëntor nga i vëllai.
Sot pritet vendimi i prokurorit publik për të ngritur akuzën ndaj 59-vjeçarit grek, i cili është arrestuar në lidhje me plagosjen për vdekje të emigrantit shqiptar.
Të martën e kaluar, Mera kishte shkuar në këtë zonë me një 59-vjeçar që banonte në të njëjtin fshat, për të vazhduar me prerjet e paligjshme të pyjeve. 51-vjeçari dyshohet se punonte për të pandehurin dhe kishin vizituar së bashku vendin e caktuar në raste të tjera për të njëjtën arsye. Dy burrat mund të kenë arritur së bashku në zonën e vështirë, por 59-vjeçari është larguar vetëm dhe pak ditë më pas viktima është gjetur i plagosur dhe pa ndjenja në pyllin e dendur.
Një nga skenarët e konsideruar nga policia është fakti se 59-vjeçari është vetëplagosur me sharrë elektrike dhe më pas e ka hedhur në drejtim të viktimës, duke e plagosur për vdekje në kofshë.
59-vjeçari grek që u vetëplagos me sharrë elektrike, jo vetëm u largua me djalin e tij për t’u dërguar në një qendër shëndetësore, por i ka marrë edhe celularin viktimës dhe e ka hedhur rrugës. Gjithashtu, për gjashtë ditë të tëra i pandehuri nuk ka njoftuar askënd për plagosjen e 51-vjeçarit, për të cilin ndoshta ka pasur dijeni, madje edhe kur është shpallur zyrtarisht i zhdukur.
Sipas banorëve të fshatit të vogël Limni, ku viktima jetonte prej dekadash, 51-vjeçari kishte shumë pak të afërm në Greqi dhe kishte marrëdhënie shumë të mira me 59-vjeçarin, pasi nuk ishte hera e parë që ata bashkëpunuan në operacionet e prerjeve të paligjshme të pyjeve.
Në kontrollet e kryera nga policia në shtëpinë e 59-vjeçarit dhe në automjetin e djalit të tij 28-vjeçar, u gjetën gjithsej pesë thika gjuetie, ndaj të dy personat u arrestuan për armëmbajtje pa leje. Dy të arrestuarit u dërguan në Prokurorinë e Shkallës së Parë Selanik.
