Kokaina e sekuestruar dy ditë më parë në anijen e ardhur nga Ekuadori ka kaluar në dy shtete europiane përpara se të zbulohej nga qeni antidrogë në portin e Durrësit.
Nga detajet e reja që Neës24 ka zbardhur rezulton se anija që mbartë kontejnerin ku u gjet kokaina nuk ka kaluar tranzit në Maltë, por pasi është nisur nga Ekuadori ndalesën e parë e ka bërë në Panama, më pas në Greqi dhe si përfundim ka ndaluar edhe në “Goia Tauro” që ndodhet në rajonin Reggio Calabria të Italisë.
Prej andej më pas anija me banane i është drejtuar portit të Durrësit, ku edhe ka zbarkuar kontejnerët e porositur nga “BanaKing” e Trifon Muratajt.
Në kontejnerët e anijes ishin banane të dy kompanive që qarkullojnë në tregun shqiptar. Sinjalizimi për lëndën narkotike u mor nga partnerët, të cilët kanë informuar Shqipërinë për një sasi të konsiderueshme kokaine, por deri tani janë zbuluar vetëm 33.5 kg.
Ndërkohë, të njëjtët punonjës të skanerit dhe oficerë të anti-drogës e anti-kontrabandës kanë kaluar në skaner edhe kontejnerë të tjerë me banane nga i njëjti destinacion.
Për këtë arsye operacioni është ende në vijim dhe po vijon kontrolli i të gjithë kontejnerëve me banane që kanë ardhur nga Ekuadori, për të verifikuar nëse ka sasi tjetër me lëndë narkotike, bazuar në informacionet që kanë marrë autoritetet shqiptare nga agjencitë partnere.
