Zbatimi i vendimit për reciprocitetin dhe targat ka ndezur një debat të ri mes Kosovës dhe Serbisë, tensionet që u reflektuan edhe në Samitin e Berlinit ditën e djeshme, ku kryeministrja Ana Bërnabiç refuzoi të takonte homologun Albin Kurti, ndërsa Presidenti Aleksandër Vuçiç nuk mori pjesë në takim.
Vuçiç duket se është angazhuar ditën e djeshme dhe gjatë mbrëmjes për të kontaktuar me serbët në Kosovë, në mënyrë që të gjejë një zgjidhje me situatën e krijuar, në një kohë që presioni nga Brukseli po rritet mbi Serbinë.
Sipas gazetës “Blic”, Vuçiç gjatë telefonatave të tij është shprehur se 72 orët e ardhshme do të jenë më të vështirat e 10 viteve të fundit në raport me Kosovën.
“Live dhe me telefon bisedat kanë zgjatur deri në orën 5:30 të mëngjesit të sotëm. Serbët janë të indinjuar. Pika e fundit ishte shkarkimi i drejtorit rajonal të Mitrovicës së Veriut, Nenad Gjuriç, për të cilin Albin Kurti nuk ka asnjë autoritet. Ai nuk mund të zëvendësohet“, zbulon një burim i “Blic”, i njohur me detajet e bisedës.
Sakaq, Vuçiç do të marrë pjesë të shtunën në mbledhjen e Qeverisë së re të Serbisë dhe do t’i njoftojë anëtarët në lidhje me zhvillimet e fundit në Kosovë.
Serbët nga Kosova do të kenë edhe një sërë takimesh, ndërsa të shtunën pritet një tubim i madh në Mitrovicë ku do të zbulojnë planin e tyre para qytetarëve.
“Do të jenë 72 orët më të vështira në 10 vitet e fundit dhe në ditët në vijim shumë gjëra do të bëhen më të qarta“, thekson burimi i Blic.
Telefonatat e Vuçiç me serbët në Veri vijnë pasi Albin Kurti njoftoi pezullimin nga detyra të drejtorit të policisë në Mitrovicë Nenad Gjuriç për shkak se ky i fundit nuk ka pranuar që të zbatojë vendimin e qeverisë së vendit për vendosien e gjobave për moszbatimin e vendimit për targat.
