Rreth dy javë pas vizitës së fundit, ambasadorja Yuri Kim është paraqitur sot në zyrat e Strukturës së Posaçme Antikorrupsion.
Kim u ndal në SPAK rreth orës 12:00 dhe mësohet se ka zhvilluar një takim me prokurorët dhe drejtuesin Arben Kraja.
“Rrini sa më larg politikës. Jemi besimplotë ndaj këtij institucioni dhe keni mbështetjen tonë”.
Ky mësohet të ketë qenë mesazhi që ambasadorja e SHBA i ka komunikuar trupës së SPAK.
Gjithashtu Kim u ka dhënë kurajë edhe tre prokurorëve që kanë regjistruar kandidaturat në garën për kreun e ri të organit të akuzës, pasi mandati që Kraja mori në 2019 përfundon më 19 dhjetor të këtij viti. Kujtojmë se në garë janë regjistruar tre prokurorët Adnan Xholi, Edvin Kondili dhe Altin Dumani.
Ambasadorja ka kërkuar gjithashtu që gara të jetë e drejtë e mos ketë ndërhyrje, ndërsa edhe njëherë ka përsëritur se prokurorët e SPAK duhet të godasin zyrtarët e lartë që janë të përfshirë në korrupsion.
Sakaq, detajet nga takimit me prokurorët dhe Arben Krajën, ambasadorja i ka zbuluar përmes një njoftimi në faqen e ambasadës së SHBA në Facebook, ku ndër të tjera zbulon se ka patur kërcënime dhe tentativa joshje ndaj tyre.
“U takova me kreun Kraja & prokurorët e SPAK për të përsëritur mbështetjen e Shteteve të Bashkuara për punën e tyre të rëndësishme. Pavarësisht kërcënimeve dhe tentativave për joshje, SPAK është i përqendruar që të japë gjithnjë e më shumë rezultate që tregojnë se askush – pavarësisht postit apo pasurisë – nuk është mbi ligjin”, shkruan Kim.
Ndër të tjera në postim, kryediplomatja amerikane në Tiranë thekson se kultura e pandëshkueshmërisë para ligjit duhet të marrë fund dhe premton se Shqipëria do të marrë frymë lirisht.
“Jo më pandëshkueshmëri. I duhet dhënë fund mënyrave të vjetra që Shqipëria të ecë përpara, të mund të bëhet anëtare e plotë e BE-së – në mënyrë që qytetarët e thjeshtë të marrin frymë lirisht dhe të ndërtojnë një jetë më të mire për veten dhe fëmijët e tyre. SHBA do vazhdojë të mbështesë zbatimin e plotë të reformës në drejtësi. Të vazhdojmë të ecim përpara së bashku!”, shprehet ajo.
