Një tjetër prokuror ka depozituar sot kërkesën për të hyrë në garën për drejtuesin e ri të Strukturës së Posaçme Antikorrupsion.
Mësohet se Altin Dumani do t’i bashkohet në garë Adnan Xholit dhe Ervin Kondilit, i cili po ashtu depozitoi sot kërkesën.
Dumani ka qenë edhe një nga tre kandidatët në garën e parë për kreun e SPAK-ut, ku garoi me drejtuesin aktual Arben Kraja dhe Ervin Kondilin.
Ai më 10 qershor të këtij viti u zgjodh zëvendësdrejtor i Prokurorisë së Posaçme me një mandat 2-vjeçar, ndërsa emir i Dumanit ishte propozuar unanimisht nga kolegët.
Dumani vjen nga radhët e Prokurorisë së Apelit. Ai është një nga prokurorët që drejtoi i pari njësinë Task Forcë, ngritur vite më parë për të luftuar krimin e “Jakave të Bardha”.
Ai ka një karrierë prej 20 vitesh si prokuror, teksa detyrën ka nisur ta ushtrojë në mars të vitit 1999 si prokuror në Sarandë.
Sakaq, afati i fundit për prokurorët që të shprehin interesin e tyre për detyrën si kreu i SPAK është 2 nëntori.
