Detaje të reja janë zbuluar për atentatin me kallashnikov që ndodhi mbrëmjen e djeshme në zonën e “Kodrës së Diellit”, ku mbeti i vrarë me tre plumba 39-vjeçari Briken Sanaj.
Sanaj edhe pse një personazh i paskeduar më parë nga policia, mësohet se përdorte disa identitete. Rojet e rezidencës ku ai banonte prej rreth një viti e dinin se quhej Anton Gjini, ndërsa fqinjët e thërrisnin “Skerdi“. Sa i përket emrit të tij të vërtetë në certifikatën e lindjes rezulton të jetë Skerdilaid Sanaj.
Viktima ka lindur më 26 shtator të viti 1983 në qytetin e Lezhës, ku edhe banon familja e tij.
Mësohet se 39-vjeçari më parë ka jetuar në Itali dhe ishte kthyer më pas në Shqipëri, për t’u vendosur në një nga lagjet më të sigurta të Tiranës, aty ku edhe i morën jetën duke e qëlluar nga një automjet tip “Benz” me targa të vjedhura që u gjet i djegur pak minuta pas ngjarjes në “Qafë-Kashar”.
Sa i përket pistave ku po heton policia, hakmarrja mbetet kryesorja pasi vëllai i 39-vjeçarit ka plagosur në vitin 2012 një person në Lezhë.
Autorët janë kujdesur që ta qëllojnë 39-vjeçarin pa praninë e familjes, sapo ishte kthyer nga dasma e kushëririt në Lezhë.
Mësohet se Sanaj kishte lënë bashkëshorten dhe dy fëmijët në shtëpi dhe është qëlluar pasi ka dalë nga garazhi. Autorët janë futur me makinë brenda rezidencës ‘Kodra e Dielli’, duke thyer edhe traun dhe kanë qëlluar me breshëri kallashnikovi drejt 39-vjeçarit.
Ai u dërgua për në spital nga shoku i tij, me një makinë tip ‘Audi’, por ndërroi jetë rrugës për te spitali i Traumës.
