Nga Boldnews.al
Ndër deklaratat e para, pak para se të ngjishej fort pas karriges kryeministrore, Edi Rama pati deklaruar: “Kam për qëllim të bëj shtet, jo që të mbaj pushtet”. Ishte gati një thënie e përzgjedhur prej “kokave të mëdha” të filozofisë apo politikës, por fjalët e thëna i mori ajri, era që i përlas ngado, pa lënë asnjë gjurmë. E vetmja gjurmë që mbetet është histerizmi i udhëtimeve jashtë vendit me avionë çartër. Nga viti 2013 dhe deri më tani kryeministri Edi Rama ka kryer 227 udhëtime me avionë të “personalizuar”.
Kjo e dhënë ka dalë pas hakerimit të sistemit TIMS, ku dyshohet se pas tyre fshihen iranianët. Edhe pse opozita e kishte denocuar prej kohësh këtë “sëmundje kronike” të Ramës, që më së paku janë miliona euro shpenzime që rëndojnë mbi taksat qytetare, ishte mohuar prej tij.
Ajo që e bën edhe më të rëndë faktin, i cili ulëret më shumë se çdo klithmë kryeministrore është e vërteta e hidhur në një diferencim të frikshëm social. Mijëra shqiptarë kryesisht të rinj po venë jetën në rrezik në udhëtimet prej më shumë se tetë orësh në gomonet e trafikut, duke kaluar kanalin e La Mansh mes Francës dhe Britanisë së Madhe. Ndërsa ata ikin “govatën e rrezikut”, jeta e të cilëve varet nga dallgët e detit, kreu i qeverisë Shqiptare është tërësisht në ajër.
Shumë emigrantë pasi mbërrijnë në Angli tregojnë tmerret u udhëtimit ilegal me gomone, ku disa prej tyre pohojnë se kanë rrezikur jetën pasi mjeti i papërshtashëm lundrues u është fundosur dhe vetëm ndëryrja e motovedetave britanike apo francize i ka shpëtuar. Po nëse ndodh tragjedia e madhe me jetë të humbura? Ndoshta kreu i qeverisë në të njëjtën kohë kur shpirtrat e qytetarëve shqiptarë përpëliten në ujë, mund të jetë në ajër me avionin çarter, të nisur diku larg në banketet që e presin në takimet zyrtare apo personale.
Udhëtimet e shpeshta jashtë vendit, me dhe pa asye, sa në vizta zyrtare të rëndomta, aq edhe në udhëtime private janë më shumë se malinje. Cili lider në botën perëndimore do i lejonte vetes një luks të tillë? Padyshim që asnjë nuk gjendet, për më tepër që Rama është kreu i qeverisë së një vendi ku varfëria vret përditë si një pandemi e fshehur.
Udhëtimet e shpeshta kryeministrore me avionë gati personal, por që paguhen nga taksat tona rrëzojnë çdo ligj të shkruar nga vetë Rama që e ka të sanksionuar se udhëtimet jashtë vendit të tijat dhe ministrave do të kryhen me “kosto të ulët”. Kjo praktikë duket se në rastin e tij personal aq që vlen për fare. Fatet qenkan tërësisht në pole të kundërta, shumë larg, për të mos u takuar në asnjë pikë. Shqiptarët me gomone dhe kryeministri i tyre me avion çarter!
