Pas pesë ndeshjeve të luajtura në grupet e Champions League, 12 skuadra kanë siguruar kualifikimin më tej. Në xhiron e fundit do të luhet për katër bileta të mbetura në lojë, me disa skuadra që shpresojnë deri në fund. Vendin e tyre në fazën e 1/8 e kanë siguruar thuajse të gjithë emrat e mëdhenj.
Nga Reali te Bayern, për të vijuar me Liverpool, Manchester City, Chelsea apo Paris Saint Germain e Borussia Dortmund. Napoli dhe Interi mbrojtën nderin e Italisë në eventin më të rëndësishëm, Porto e Benfica konfirmohen si skuadra me peshë, teksa Club Brugge ishte surpriza e madhe e këtij edicioni.
Për katër vendet e mbetura Shakhtarin e pret finalja me Leipzig në Grupin F, me ukrainasit që kërkojnë me patjetër fitoren. Një prej ekipeve që luan sezonin në 90 minuta është Milani, me kuqezinjtë që do të kënaqeshin me një pikë në duelin direkt me Salzburg.
Ato që i kanë dhënë lamtumirën turneut, përveç Juventusit janë edhe Barcelona, Atletico Madrid e Sevilla, teksa vetëm Real Madrid arriti të kalonte fazën e grupeve. Ky është një rekord negativ dhe një dështim historik. Asnjëherë më parë, prej sezonit 2003-2004 kur nisi të përdorej formula e re e Champions, nuk kishte ndodhur që nga katër ekipe të La Liga-s,tre të eliminoheshin prej fazës së grupeve.
