Besnik Bislimit nuk i lejohet pjesëmarrja në konferencën e planifikuar në Beograd, e kthejnë në Kosovë
Zëvendëskryeministri i Kosovës, Besnik Bislimi, është kthyer në Kosovë pa mundur të realizojë vizitën e planifikuar në Beograd.
Ditën e djeshme mediat u njoftuan se Bislimi të enjten do të merrte pjesë në konferencën e Forumit për Marrëdhënie Etnike, në tryezën e diskutimit “Dialogu Diplomatik”, me temë “Kosova dhe Perspektiva Evropiane e Rajonit”.
Konferenca pritej të niste në orën 17:00, por Dushan Janjiç, organizator i konferencës në të cilën ishte i ftuar Bislimi, ka zbuluar për Express se numrit dy të qeverisë së Kosovës i është dashur të kthehet mbrapsht pasi autoritetet serbe nuk i kanë garantuar sigurinë.
Janjiç ka konfirmuar se Bislimi edhe zyrtarisht ka anuluar pjesëmarrjen duke shtuar se po përgatitin edhe një konferencë për mediat lidhur me këtë çështje.
“Ai është duke u kthyer në Merdare”, ka thënë Janjiç.
Ndërkohë, Bilsimi parashikohej që të qëndronte në Beograd edhe të premten, ku do të ishte pjesëmarrës në një panel diskutimi, në kuadër të “Belgrade Security Conference”, me temë “Kosova dhe Serbia – Shmangia e rrugës pa dalje”, me fillim nga ora 18:15./Telegrafi
