Ish-kryeministri Sali Berisha ka publikuar 2 foto të inspektorit të Policisë Bashkiake të Tiranës, Dritan Hardhia, duke e cilësuar atë kryebandit të kreut të Bashkisë Tiranë, Erion Veliajt. Në njërën prej fotove, Hardhia është duke u takuar me Veliajn, ndërsa në tjetrën duket me dy armë.
“Në të dy fotot është Dritan Hardhia, kryebanditi i Erion Velisë, për të cilin mediat informuan se është arrestuar në vitin 2004 për rrëmbim me armë”, shkruan Berisha.
Boldneës.al denoncoi të shkuarën kriminale, të “heroit” i Bashkisë së Tiranës.
Ai u bë i njohur gjatë protestës së shoqërisë civile kundër ndërtimit të Parkut të Lojërave, ku u shfaq si viktimë e dhunës së protestuesve. Dritan Hardhia pretendoi se më 6 mars u godit me lopatë në kraharor nga një vajzë protestuese, ndërkohë që u vizitua nga Veliaj në spitalin e QSUT.
“Dritani është realisht një aktivist i shoqërisë civile dhe ky është njeriu që realisht e nderon qytetin. Ky është një aktivist i vërtetë. Sot pamë një protestë që mund të ishte realisht një protestë e shoqërisë civile dhe s’kishte arsye për një protestë të dhunshme.”- deklaroi Veliaj duke e cilësuar si një polic shembullor.
Por e shkuara e tij problematike tregon të kundërtën. Në vitin 2004 ai rezulton të ketë kryer një grabitje me armë në zonën e Fushës së Aviacionit. Ai është arrestuar nga policia për veprën penale të vjedhjes me dhunë dhe në bashkëpunim.
“Përfundojnë në prangat e policisë 2 grabitës dhe shoqërohen 2 të tjerë. Një qytetar, me iniciale P.N., ishte ndaluar nga persona të armatosur me automatik, duke e kërcënuar që t’u jete të gjithë paratë dhe sendet me vlerë që posedonte. Ai u qe përgjigjur negativisht kërkesave të tyre. Por, pak sekonda më pas e pa veten pre e dhunës së tyre. Viktima P.N. lajmëroi menjëherë policinë për t’i ardhur në ndihmë. Pas një aksioni të rrufeshëm, u bë i mundur arrestimi i 2 prej tyre, Dritan Hardhija, 25 vjeç dhe Roland Dervishi, 18 vjeç.”- thuhej në njoftimin e Policisë së Shtetit në atë kohë.
Pasioni i tij për armët dhe dhunën shihen edhe në fotot e publikuara.
Në Gjykatën e Rrethit Gjyqësor Tiranë rezultojnë 2 padi penale ndaj Dritan Hardhisë për dhunë në familje dhe detyrimin për pension ndaj djalit të vetë.
