Dorian Petoku, i njohur ndryshe edhe si ‘Mbreti i narkos shqiptar’, është liruar nga burgu.
Dorian Petoku ishte i dënuar me 12 vite burg për interes të drejtësisë Italiane. Ai u arrestua në Shqipëri në vitin 2019-të, por u deshën dy vite për ekstradimin e tij drejt Italisë. Petoku u ekstradua në 21 tetor të vitit të kaluar në Itali, por dënimi i tij në burgjet italiane zgjati vetëm një vit, pasi gjykata vendosi lirimin e tij duke i dhënë masën arrest shtëpie.
Sipas mediave italiane ai do të pajiset me një byzylyk elektronik për t’i kontrolluar lëvizjet, dhe pjesën e mbetur të dënimit do ta kalojë në komunitetin e Morlupos në “Green Point Line”.
“Dorian Petoku është narkoman”, thonë mjekët shqiptarë që e vizituan ndërsa ishte në burgun e Tiranës. Këtë e konfirmojnë edhe mjekët italianë që e kanë analizuar: në trupin e tij ka gjurmë droge, pavarësisht tre viteve të kaluara në burgje.
Petoku nuk është vetëm një trafikant droge, ai është “mbreti i trafikut evropian të drogës” dhe është një nga figurat më të spikatura të mafies shqiptare, e cila ka mbushur Romën me kokainë, marijhuanë dhe armë. Petoku ra në pranga falë operacionit të përbashkët me autoritetet italiane të koduar “Brasile low cost”.
33-vjeçari akuzohej se ishte pjesë e një grupi që kishte tentuar të trafikonte 7 ton kokainë nga Brazili në Itali, por autoriteteve në Romë u kishte shpëtuar, ndërsa tashmë do të përballet me veprat penale.
Petoku nuk është kriminel si shumë të tjerë, thonë mediat italine, por është kushëriri i shefit të parë shqiptar të bandave kriminale, Arben Zogu dhe paraardhësi i Elvis Demçes, i vetëshpallur “Zot”.
Doriani u rrit në Shqipëri, në Lezhë, qytet që është kthyer në skenë për grupe të shumta kriminale duke u pasuruar e duke trafikuar armë, qenie njerëzore dhe drogë.
