Armando Broja ka luajtur sot ndeshjen e tij të parë si titullar me fanellën e Çelsit në Premier Ligë. Një ndeshje ndaj Brentford ku ai krijoi disa aksione të mira dhe ku trajneri Graham Poter i besoi rreth një orë në fushë futbollistit të përfaqësueses shqiptare.
Ndoshta jo një ndeshje për t’u vënë në kornizë për lojtarin, i rrethuar gjithmonë nga shumë mbrojtës kundërshtarë, por gjithsesi ai diti të vinte në vështirësi prapavijën e vendasve me shpërthimet e tij të zakonshme.
Faqja e specializuar për statistikat, “Sofascore”, ka përpiluar për “Panorama Sport” shifrat e Brojës në këtë ndeshje, ku ai në 23 prekjet e topit ia doli të driblonte një herë kundërshtarët dhe të krijonte një rast të rrezikshëm, për fat të keq pa gjetur rrjetën. Këto statistika i kanë siguruar atij notën 6,2 për ndeshjen e parë si titullar te Çelsi në Premier Ligë.
