Skandal në Gjermani në ndeshjen e kupës mes Manheim dhe Nuremberg. Në prani të mbi 17 mijë shikuesve, folësi i stadiumit, Stephan Christen, pasi u publikuan dy formacionet, vendosi t’ia kushtonte ndeshjen Christian Hehl, i cili u nda nga jeta të dielën. Asgjë e çuditshme, përveç se Hehl është një i dënuar, si dhe një neo-nazist.
“Kjo ndeshje është për ty,” tha Christen në mikrofon. Hehl ishte dënuar më parë për trafik droge dhe posedim të paligjshëm të armëve të zjarrit. Jo vetëm kaq, mes viteve 2014 dhe 2016 është përjashtuar nga stadiumet për pjesëmarrje në përplasjet me policinë.
Administratori i Mannheim u përpoq të distancohej nga incidenti dhe tha se “dedikimi nuk u vendos nga klubi, ne nuk dinim asgjë për të”. Nga ana e tij, folësi u justifikua duke u shprehur se kishte marrë përmes rrjeteve sociale një kërkesë nga fansat, të cilën ai donte ta kënaqte. Christen siguroi gjithashtu se ai nuk e dinte se kush ishte Hehl.
