Policia e Shtetit ka sqaruar incidentin e ndodhur ditën e djeshme me sistemin TIMS, ku për 1 orë e 40 minuta në doganën e Kapshticës, atë të Kakavijës dhe në Portin e Durrësit, gjithçka doli jashtë funksionit.
Frika ishte se sistemi ra sërish prej sulmeve të mundshme kibernetike nga ana e hakerave iranianë, ashtu siç ndodhi një muaj më parë, por sipas policisë sistemi u fik me urdhër nga Drejtoria e Përgjithshme e Doganave.
Policia sqaron se ndërhyrja është bërë për të përmirësuar sigurinë dhe performancën e sistemit TIMS dhe se ndërprerje të tilla do të bëhen edhe në ditët në vijim.
Sqarimi i Policisë së Shtetit:
Në lidhje me disa lajme të publikuara mbrëmjen e djeshme, në disa media dhe portale, në të cilat është pretenduar se ka ndodhur përsëri sulm kibernetik ndaj sistemit TIMS, sqarojmë opinionin publik se:
Ndaj sistemit TIMS, mbrëmjen e djeshme, nuk ka ndodhur sulm kibernetik, por në kuadrin e përmirësimit dhe rritjes së performancës së sistemit TIMS, mbrëmjen e djeshme u realizuan disa procese të parashikuara mirëmbajtjeje, të cilat ndërprenë shërbimin në interval të shkurtër kohor, në disa prej pikave kufitare, por pa sjellë pengesa në lëvizjen e lirë të qytetarëve.
Konfirmojmë se pas ndërhyrjes së shkurtër, mbrëmjen e djeshme, sistemi TIMS vijon të jetë funksional, në të gjitha pikat kufitare.
Sqarojmë se edhe në ditët në vijim, do të ketë ndërprerje me afat të shkurtër kohor, në pika të ndryshme kufitare, për shkak të ndërhyrjeve të brendshme, me qëllim përmirësimin e performancës së sistemit TIMS.
Policia e Shtetit kërkon mirëkuptimin e mediave që para se të publikojnë lajme që kanë impakt tek qytetarët, të kërkojë informacion zyrtar pranë strukturave përkatëse të Policisë së Shtetit.
