Sokol Tabaku ka dalë këtë të Hënë para Gjykatës së Shkallës së Parë Berat, për tu njohur me masën e sigurisë.
Ai akuzohet për veprën penale “Plagosje e rëndë me dashje”, pasi dy ditë më parë masakroi në kokë e trup me sende të forta 40-vjeçarin Arjan Marini, pas një konflikti.
Prokurori i çështjes Ledion Tema, pasi ka paraqitur provat e nevojshme që e implikojnë Tabakun, i ka kërkuar gjykatës vlerësimin “të ligjshëm” të arrestimit të tij dhe ka kërkuar për të masën e sigurisë “arrest me burg”.
Gjyqtarja Enetela Gjoni, pasi ka dëgjuar edhe pretendimet e avokatit mbrojtës, ka vendosur të vlerësojë “të ligjshëm” arrestimin e 30-vjeçarit Sokol Tabaku dhe ka caktuar për të masën e sigurisë “arrest me burg”, me afat 60-ditë.
Avokati i Tabakut Shuaip Syri, ka deklaruar se klienti i tij është i pafajshëm dhe se nuk është ai autori i kësaj ngjarjeje të rëndë.
“Motra e të plagosurit Ermini Marini shprehet se vëllai i saj u gjet i masakruar dhe i mbuluar me gjak poshtë Urës së Goricës dhe gjendja e tij është e rëndë, ai ndodhet në koma. Erminia kërkon drejtësi për vëllain e saj dhe burg për kriminelin që e katandisi në këtë gjendje”, ka thënë ai.
I plagosuri ndodhet në gjendje kome në Spitalin e Traumës në Tiranë, ndërkohë që mjekët e Spitalit Rajonal të Beratit konfirmuan pas dërgimit të të plagosurit tek Trauma se ai ka pësuar dëmtime në kafkën e kokës dhe në tru.
Arjan Marini ishte takuar me Tabakun për tu sqaruar, pasi ky i fundit kishte kohë që i ngacmonte vajzën.
Duke i kërkuar ti linte të qetë vajzën ai është masakruar me grushte, shkelma e sende të forta nga Tabaku, që pasi e ka lënë të shtrirë në tokë e të mbuluar me gjak është larguar nga vendngjarja.
Kanë qenë disa banorë të lagjes që e kanë pikasur 40-vjeçarin pa ndjenja dhe me gjak në tokë dhe kanë njoftuar policinë.
