Një aksion i repartit për çështjet e brendshme të Greqisë Veriore kanë çuar në arrestimin e një numri të madh punonjësish të policisë, doganierëve dhe disa personave të tjerë në doganën e Kapshticës.
Sipas televizionit shtetëror grek ERT operacioni është finalizuar pas disa ditësh vëzhgime dhe arrestimit u bënë për veprën penale të pjesëmarrjes në organizatë kriminale dhe falsifikim.
Operacioni është zhvilluar mëngjesin e së hënës dhe sipas informacioneve janë sekuestruar para dhe pasaporta false, ndërsa në pranga kanë rënë 14 persona.
Policia e Punëve të Brendshme ka marrë një denoncim dhe prej andej ka nisur hetimi, në kuadër të të cilit janë monitoruar telefonat e të përfshirëve, nga të cilët janë regjistruar biseda inkriminuese.
Pas arrestimeve, janë kontrolluar edhe disa shtëpi në Follorinë për të mbledhur prova shtesë.
