Qytetarët e Elbasanit janë të parët që janë ngritur në protestë për rritjen e çmimeve të karburantit dhe shtrenjtimin e shportës së ushqimeve bazë, në një kohë që inflacioni arriti në 8.1% në muajin shtator.
Thirrjes së bërë në rrjetet sociale, por edhe nga organet e Partisë Demokratike në Elbasan i janë përgjigjur qindra qytetarë, të cilët kanë fikur makinat në shenjë proteste në sheshin “Gensher” dhe kanë deklaruar “s’mban më ujë pilafi” me vendimet e Bordit të Transparencës dhe neglizhencën e qeverisë së Edi Ramës.
Tubimit të sotëm i është bashkuar edhe nënkryetari i PD, Luçiano Boçi, i cili ashtu si në Parlament ka përsëritur se qytetarët janë duke ju drejtuar shesheve, sepse preken çdo ditë nga rritja e kostos së jetesës, pasiguria dhe shpopullimi që po zbraz Shqipërinë.
“Arsyet janë të ditura, nuk është vetëm rritja e naftës, është rritur pasiguria e shpopullimi. Të parët sot janë qytetarët e Elbasanit, janë të revoltuar ndaj padrejtësisë. Nuk është vetëm abuzim, por është vjedhje e hapur rritja e çmimit të naftës”, tha Boçi.
Nënkryetari i PD shtoi më tej: “I bëj thirrje qytetarëve të na bashkohen pasi nuk ka më kohë për të humbur, kjo revoltë është e domosdoshme. Jemi të gatshëm si PD të jemi pranë qytetarëve, t’i mbrojmë ndaj abuzimeve jo vetëm ekonomike por edhe policore. Sot ishim dëshmitarë të bllokimit të aksit kryesor nga policia që të duket sikur protesta të mos kishte funksionuar”.
Duke u ndalur te vendimet e bordit të transparencës Boçi tha se “loja” që po bëhet me çmimin e naftës është një vjedhje e hapur e qytetarëve.
Boçi shkoi edhe më tej duke akuzuar qeverinë se po përdor skemat abuzive për të mbushur arkën pasi ndodhet përpara zgjedhjeve lokale me një buxhet të rrënuar dhe i nevojiten miliona euro për të blerë vota dhe për të organizuar fushatën.
“Shihet qartë që qeveria ka nevojë për para abuzive, ua rrëmben qytetarëve përmes këtyre formave siç është rritja e karburanteve që depoziton miliona euro në arkën e shtetit nëpërmjet TVSH-së. Nuk ka ndihma për pensionistët e studentët dhe ka çmimet më të larta të karburanteve. Jo vetëm në raport me pagën, por çmimi është më i larti në rajon. Kur shikon që çmimet në bursë bien ,dhe në vend ngrihen rritet revolta. Ka një fushatë zgjedhore përpara dhe i duhen miliona euro për të blerë vota dhe për të organizuar fushatat”, deklaroi nënkryetari i selisë blu.
