Fatjon Murati i cili u kap ditën e djeshme brenda një makine në Tiranë nën shoqërinë e Endrit Dokles, nuk është një emër i panjohur për drejtësinë.
Murati ishte i shpallur në kërkim ndërkohë që emri i tij, përfshihet edhe në listën e të dyshuarve për masakrën e ndodhur në Fushë-Krujë ku mbetën të vrarë, 3 persona, ndërsa policia ende nuk ka zbardhur ngjarjen kriminale. Murati ka qenë një prej personave të marrë në pyetje nga policia pasi dyshohet se është në dijeni të autorëve të vrasjes së trefishtë: Brilant Martinajt, Diklen Vatës dhe Besmir Hoxhës.
Prokuroria e Krujës kërkoi marrjen në pyetje në lidhje me atentatin me tre viktima dhe të shtetasve Alesio Dobrozi, Rohan Brahimi dhe Fatjon Murati, i cili u kap nën shoqërinë e Endrit Dokles.
Policia mbrëmjen e djeshme ka arrestuar 3 shtetas, ku përvec Endrit Dokles dhe Fatjon Murati, i pranishëm në makinë ishte dhe Gentian Reçi, nipi i ish-policit Xhelal Reçi qe u vra para 1 viti në Laç.
Kujtojmë se Dokle ka qenë më parë i dënuar me burgim të përjetshëm për një seri vrasjesh të kryera në kuadër të bandës së Durrësit. Ai doli nga qelia pasi avokati paraqiti arsyetimin se klienti i tij “kishte kryer 25 vite burgim dhe ishte sjellë mirë”, ndërsa shtoi se Dokle nuk ishte në gjendje të mirë shëndetësore.
