Dy vëllezërit Indrit dhe Gentian Beqiraj, të cilët zbuluan një grup kriminal me 15 anëtarë dhe autorin e “Masakrës së Don Boskos”, organizuar nga Kasandër Noga për të ekzekutuar armikun e tij Geron Hasanbelliu, u lanë sot në “burg pa afat” nga Gjykata e Durrësit.
Por, ndër të tjera në rrëfimet e tyre para hetuesve ata zbuluan se ishin porositur për të kryer një atentat ku do të ekzekutonin personazhin e njohur të krimit Pëllumb Muharremi, më tepër i njohur si “Rrumi i Shijakut”.
Ndërkohë ngjarja që çoi në zbardhjen e këtij episodi krimesh dhe atentatesh të përfolura, është pemngamrrja e Indrit Beqirajt në autostradën Tiranë-Durrës, pikërisht nga njerëzit e besuar të “Rrumit”.
Gazetarja e kronikës Klodiana Lala ka zbuluar në “Opinion” se vëllezërit prej kohësh ishin duke vëzhguar lëvizjet e Muharremit.
“Ata ishin duke udhëtuar me një motor, papritur një automjet i ka ndjekur, i ka goditur nga pas. Ata ishin në një fshat që quhet Kocas dhe që njihet si fshat i kontrolluar nga Aleksandër Laho, ose Rrumi. Dihet që Rrumi është një personazh i fuqishëm në atë zonë. Që pas atentatit 1 nëntor 2019 kishte marrë masa shumë të rrepta ndaj jetës së tij”, tha ajo.
Më pas duke iu referuar detajeve nga dosja hetimore, Lala zbuloi se “Rrumi” ndiqej prej një jave nga dy vëllezërit.
“Sipas versionit zyrtar të prokurorisë, dy vëllezërit Beqiraj kishin te paktën një javë që vëzhgonin ambientet ku qëndronte Laho. Mesa duket ai e ka kuptuar që vëllezërit ishin duke e vëzhguar. Në një moment, sipas prokurorisë ai ka urdhëruar njerëzit e tij të besuar, njëri prej tyre Agron Bejdolli, personazhi i cili e transportoi në spital në 2019. Motoçikleta është goditur , njërin prej tyre e kanë marrë me forcë dhe e kanë futur në makinë, ndërkohë që vëllai tjetër ka mbetur i rrëzuar. Ai ka njoftuar policinë. Më pas është liruar nga personat, të cilët i kanë marrë edhe telefonin për të parë se me kë kishte komunikuar ai”, zbuloi gazetarja.
Ndërkohë, më tej ajo thekson se Indriti dhe Gentiani janë “zbërthyer” në momentin kur kanë kuptuar se ishin duke shkuar në burg.
“Në momentet kur ata janë shoqëruar dhe janë vënë para disa pikave kryesore që rrezikon të shkonin prapa hekurave ata kanë treguar. Ata kanë kërkuar garanci për familjet e tyre dhe më pas kanë treguar për ngjarjet, ku më e rënda është ajo e Don Boskos”, deklaroi Lala.
