Me një vendim të qeverisë shqiptare për indeksimin e pagave në disa sektorë, parashikohet që në Policinë e Shtetit rreth 7 mijë policë të nivelit bazë të përfitojnë rritje page 15%.
Pavarësisht se e përshëndet këtë rritje, Sindikata e Policëve në detyrë ka rezerva për vendimin pasi sipas tyre rritja nuk mjafton për të përballuar inflacionin në rritje.
Trajtimi financiar i punonjësve të policisë sipas gradave ka diferenca të mëdha. E teksa qeveria pretendon se po shton në pagën e përmuajshme të punonjësve të policisë 8 mijë lekë, sipas sindikatës prej muajsh policët nuk marrin dietat apo pagesat për ushtrimin e detyrës në largësi nga vendi i banimit.
Mbi 12 mijë punonjës të Policisë së Shtetit prej korrikut kanë një kontratë të re kolektive pune. Sipas TCH një prej përfitimeve kryesore nga kjo kontratë është marrja e një vakti ushqim për punonjësit e policisë i cili deri më tani nuk është dhënë as si vakt dhe as si shtesë në pagë.
