Kombëtarja shqiptare është në një situatë të vështirë teksa shkak janë bërë rezultatet e dobëta dhe loja aspak bindëse nën drejtimin e Edi Rejës.
Presidenti Armand Duka apo FSHF-ja, nuk e kanë zyrtarizuar ende largimin e trajnerit italian edhe pse tashmë gjendja dihet dhe mund të themi që çdo gjë ka mbaruar. Flitet që 76-vjeçari do të qëndrojë për të drejtuar edhe dy miqësoret, me Arabinë Saudite dhe Italinë. Por a është kjo në interes të Kombëtares? Patjetër që jo, sepse është një kohë e humbur.
Nëse do të vijë një trajner i ri, pse të mos fillojë nga detyra që përpara këtyre miqësoreve. Do të ishte një mundësi e mirë për t’u njohur me grupin e lojtarëve, mentalitetin, frymën dhe ambientin kuqezi, që më pas do të sillte edhe përgatitjen për kualifikueset e radhës.
Aktualisht kanë filluar spekulimet për emrat e kandidatëve për stolin e Shqipërisë, që pritet të zëvendësojnë Edi Rejën.
Xhankarlo Kamoleze është njëri prej tyre, për vetë faktin që ka qenë edhe më përpara duke mbajtur postin e drejtorit teknik të ekipeve kombëtare dhe ka mbikëqyrur nga afër gjithë situatën. Ai është larguar së fundmi nga ky post dhe FSHF-ja nuk ka dhënë ndonjë arsye për këtë largim.
Një tjetër opsion është Besnik Hasi, i cili mbetet “kandidati i përjetshëm” për këtë post. Një ish-kapiten kuqezi që aktualisht është pa ekip dhe më parë ka drejtuar skuadra si Anderlecht, Olimpiakos apo Legian e Varshavës.
Një tjetër alternativë që spekulohet, është mundësia e rikthimit të Gianni de Biasit, trajnerit të suksesshëm që arriti të kualifikohej me Shqipërinë në “EURO 2016”. Edhe pse ai është trajner i Azerbajxhanit, me ofertën e duhur mund të shohim edhe një rikthim të bujshëm.
