Analiza/ Miliona euro fitime për Bankat e Nivelit të Dytë në Shqipëri

Open Data Albania po hulumton mbi Fitimet e Bankave të Nivelit të Dytë në Shqipëri për periudhën 2014-2015.

Në vlerësimin e fitimit të bankave të nivelit të dytë janë analizuar dy indikatorë të rëndësishëm që karakterizojnë fitimin siç janë: fitimi/humbja para tatimit (EBITA), i cili tregon vlerën monetare të fitimit (bruto) të një shoqërie, pa zbritur ende detyrimet fiskale të tatimit mbi fitimin, dhe norma e kthimit mbi kapitalin e angazhuar (ROCE), e cila tregon eficiensën e përdorimit të kapitalit përmes një raporti (%) mes EBITA dhe kapitalit të shoqërisë.  Në bazë të të dhënave zyrtare nga Banka e Shqipërisë por edhe nga ekstraktet e bankave pranë Qendrës Kombëtare të Biznesit (QKB), deri në Mars të vitit 2017, situata e fitueshmërisë së sistemit bankar paraqitej si vijon:

Fitimi/Humbja para tatimit (EBITA) Sistemi bankar në Shqipëri rezulton me një fitim të konsiderueshëm si në vitin 2014 ashtu ehe në vitin 2015, edhe pse me një trend rënës. Fitimi i bankave të nivelit të dytë si në vitin 2014 rezulton të jetë rreth 14.3 miliardë Lekë, ose rreth 105.7 milionë Euro. Ndërsa në vitin 2015 fitimi i bankave rezulton të ketë pësuar një rënie prej rreth 28% në nivelin e 10.2 miliardë Lekëve ose rreth 75.6 milionë Eurove. Në vitin 2014 rezulton që 13 nga 16 banka të jenë me fitim para tatimit, ndërsa 3 me humbje. Në vitin 2015 rezulton që 11 banka janë me fitim ndërsa 5 me humbje.

5 nga 16 banka kanë rezultuar me një rritje të qëndrueshme të fitimit para tatimit në vitin 2014 dhe 2015, kryesuar nga FI BANK me një rritje të fitimit para tatimit prej 140.2%, e shoqëruar nga Union Bank me 77.4% dhe Banka e Bashkuar e Shqipërisë me 21.7%.  6 nga 16 banka edhe pse kanë rezultuar me fitim para tatimit në vitin 2015 tregojnë një trend rënës të këtij fitimi krahasuar me një vit më parë, kryesuar nga Banka Credins me një rënie të fitimit prej 76.9%, e ndjekur nga Banka Societe Generale Albania me 42% dhe Banka NBG Albania me 27.5% të rënies së fitimit para tatimit.

Sa i përket fitimit para tatimit në vlerë nominale, në vitin 2015 kryeson BKT me 7.3 miliardë Lekë, Raiffeisen Bank me 4.1 miliardë Lekë, Intesa Sanpaolo me 2.7 miliardë Lekë, Union Bank me 441 milionë Lekë dhe FIBANK me 297 milionë Lekë. Një renditje e ngjashme është edhe për vitin 2014 ku kryesojnë përsëri BKT, Raiffeisen Bank dhe Intesa Sanpaolo.

2 nga 16 banka (Alpha Bank dhe Banka Ndërkombëtare Tregtare) kanë kaluar nga një gjendje financiare me fitim para tatimit në vitin 2014 në humbje të konsiderueshme për vitin 2015. Ndërsa 3 banka kanë ruajtur trendin rënës krahasuar me vitin 2014. Kryeson Banka Amerikane e Investimeve me 4 fishim të humbjes (kryesisht për shkak të ristrukturimit dhe shitjes nga CreditAgricole Albania tek NCH Capital dhe Tranzit shpk). Ajo pasohet nga Banka Tirana me një 3 fishim të humbjes për vitin 2015 dhe më pas Veneto Bank me një rënie prej 100% krahasuar me vitin parardhës.

Sa i përket humbjes financiare në vlerë nominale, në vitin 2015 kryeson Banka Amerikane e Investimeve me 2.7 miliardë Lekë, e ndjekur nga Alpha Bank me 1.65 miliardë Lekë dhe Veneto Bank me 1 miliardë Lekë. Një rënditje e ngjashme është edhe për vitin 2014 ku kryesojnë përsëri Banka Amerikane e Investimeve (ish-CreditAgricole Albania), Veneto Bank dhe Tirana Bank.