Tirana humbi me rezultatin e pastër 0-3 në fushën e vet me Maccabi Tel Aviv, duke u eliminuar nga Europa League. Golat u shënuan nga skuadra izraelite, e cila shënoi një herë në pjesën e parë dhe dy herë në të dytën.
Partizani luajti në transfertë ndeshjen e kthimit të turit të parë të Europa League me Botev Plovdiv. Takimi i parë i luajtur në “Selman Stërmasi” përfundoi 3-1 për bullgarët. Edhe sot të kuqtë u mundën, por minimalisht 1-0. Golin e vetëm të takimit e shënoi Brisola në minutën e 23-të. Kështu Partizani i jep fund aventurës evropiane që në turin e parë.
Skënderbeu fitoi 5-0 ndaj skuadrës modeste të Sant Julia të Andorrës. Korçarët kishin fituar ndeshjen e parë minimalisht 1-0, por në transfertë treguan forcën e tyre reale. Të besuarit e Ilir Dajës siguruan me lehtësi kualifikimin në turin tjetër. Pas eliminimit të dy ekipeve kryeqytetase, Tirana dhe Partizani, Skënderbeu është i vetmi ekip i Superiores që vazhdon aventurën në Ligën e Europës.
