Greva dhe protesta, ishte mesazhi që Edi Paloka i përçoi shqiptarëve të revoltuar me qeverisjen e Edi Ramës, pas përfundimit të mbledhjes së Këshillit Kombëtar të Partisë Demokratike.
Në cilësinë e kryetarit të Këshillit, Paloka theksoi se aksioni opozitar ka hyrë në një fazë ku do të jetë i pandalshëm dhe kërkoi që qytetarët tyë ngrenë zërin së bashku me mësuesit, studentët, pedagogët dhe të gjithë shtresat që guxojnë të dalin në shesh kundër vendimeve të qeverisë.
Duke u ndaluar te vendimet që u morën në këtë mbledhje, Paloka tha se Këshilli ka miratuar disa rregullore, ndërsa sqaroi edhe propozimin që mori mbështetje për shtyrjen e diskutimeve për rregulloren për primaret.
“U miratuan rregulloret e para dhe kodi etik. Pati një propozim që rregullorja për primaret për përzgjedhjen e kandidaturave për pushtetin lokal të shtyhet për një moment tjetër që të njihen me përmbajtjen e rregullores. Mbledhja e radhës do jetë këtë të shunë”, tha Paloka.
Kreu i Këshillit Kombëtar të PD, Edi Paloka, bëri me dije se ditën e shtunë do të mblidhet sërish Këshilli Kombëtar i PD-së.
“Mbledhja e ardhshme u vendos të jetë këtë të shtunë, meqë statuti parashikon 5 ditë nga njoftimi. Sot pati diskutime lidhur me qëndrimet që duhet të mbajë PD, apo aksionin opozitar dhe u ra në dakordësi që sa më shpejt të organizohen jo vetëm protesta , por një shumëllojshmëri aktesh dhe aksione opozitare përfshirë greva të mëdha, duke filluar nga sindikatat që funksionojnë në Shqipëri dhe gjithë grupimet e mëdha që kanë probleme si mësues apo mjekë, me qëllim që aksioni opozitar te jetë i shumëllojshme”, shtoi ai.
