Çështja e zhdukjes së të shumëkërkuarit të drejtësisë Ervis Martinaj dhe hijet e misterit që e shoqërojnë vijojnë të mbeten një “patate e nxehtë” në duart e policisë dhe drejtësisë shqiptare.
I detyruar me një urdhër që ia ka komunikuar në një dalje publike vetë Edi Rama, drejtori i ri i Policisë së Shtetit, Muhamet Rrumbullaku e ka kohën e limituar për të zbardhur këtë çështje.
Rama i kërkoi në ditën e tij të emërimit, që strukturat e drejtuara nga Rrumbullaku t’i tregojnë shqiptarëve nëse është vrarë Martinaj, dhe nëse e kundërta ndodh, që ai rezulton të jetë ende gjallë, ta arrestojnë dhe ta vendosin para drejtësisë.
Pikërisht detyrën që i ka lënë kryeministri, Rrumbullaku është kujdesur që ta trajtojë me seriozitet edhe sot, teksa deklaroi se policia është duke punuar për të zbardhur zhdukjen e Ervis Martinaj dhe do të flasë vetëm kur të ketë fakte dhe prova konkrete.
“Mund t’ju them që strukturat e Posaçme të luftës kundër krimit, në Drejtorinë e Përgjithshme dhe në nivel vendor janë të angazhuara maksimalisht. Do të flasim mbi fakte, mbi prova. Nuk mund të flasim pa pasur prova”, deklaroi kreu I Uniformave Blu.
Në të njëjtën linjë qëndrimi këmbënguli edhe ministri i Brendshëm Bledi Çuçi, duke theksuar se shqiptarëve do t’u tregohen vetëm provat dhe pa to s’do të ketë deklarata në lidhje me çështjen e bujshme.
“Ne do të flasim kur të kemi prova. Policia e shtetit nuk mund të flasi pa pasur prova” tha ministri.
