Kolegji Zgjedhor pranoi ankimimin e LSI-së duke hedhur poshtë vendimin e Komisionit Qendror të Zgjedhjeve, përsa i përket ndarjes së numëruesve. Kolegji vendosi se LSI-së i takon numëruesi i tretë, ndërsa numëruesi i katërt duhet të hidhet në short mes PDIU-së dhe PR-së.
Pasi dëgjoi qëndrimet e palëve, trupa e Kolegjit Zgjedhor, drejtuar nga Gjin Gjoni, vendosi të pranojë kërkesën e Lëvizjes Socialiste për Integrim duke rrëzuar kështu vendimin e Komisionit Qendror të Zgjedhjeve përsa i përket ndarjes së numëruesve.
Trupa e kolegjit duket se u bind nga arsyetimi i Lëvizjes Socialiste për Integrim, me avokat ish-ministrin e Drejtësisë, Ylli Manjani, i cili theksoi se në ndarjes mes partive në qeverisje dhe atyre në opozitë, KQZ duhej t’i referohej strikt Kodit Zgjedhor, i cili njeh vetëm rezultatin e këtyre forcave politike në zgjedhjet e fundit për Kuvendin, ato të vitit 2013, sipas të cilit PDIU rezulton në opozitë e jo në mazhorancë.
Gjatë seancës, Komisioni Qendror i Zgjedhjeve shpjegoi se i ishte përmbajtur qëndrimeve të PDIU-së e cila kishte kaluar në koalicion qeverisës që në zgjedhjet vendore të vitit 2015. Edhe vetë përfaqësuesi i PDIU-së deklaroi përpara trupës se partia që përfaqësonte nuk ishte pjesë e opozitës por e mazhorancës. Kjo nuk u mor në konsideratë nga Kolegji, pavarësisht paralajmërimit të Partisë Demokratike, e shprehu shqetësimin për prishje të balancës mazhorancë-opozitë në grupet e numërimit.
Me këtë vendim, PDIU do të vijojë të jetë në gjysmën e grupeve të numërimit, por tashmë do t’i ndajë ato jo më me LSI-në, por me Partinë Republikane.
Përfaqësuesit e KQZ-së dhe të PDIU-së u larguan pa komentuar vendimin
